Kókshetaýda jylý tarıfi qymbattady

KÓKShETAÝ. QazAqparat - Kókshetaýda jylý tarıfi kóterildi. Osyǵan baılanysty qala turǵyndary jylý aqysyn - 20 paıyzǵa, bıýdjettik uıymdar - 12 paıyzǵa jáne zańdy tulǵalar - 15 paıyzǵa artyq tóleıtin boldy. Bul týraly «Kókshetaý jylý» kommýnaldyq kásiporny bas dırektorynyń orynbasary Asqar Nurmaǵanbetov aıtty, dep habarlaıdy QazAqparat tilshisi.

Kásiporyn basshylyǵynyń aıtýynsha, jylý tarıfin kóterýge kómirdiń baǵasy men tasymaldaý qunynyń ósýi sebep bolyp otyr.

«2022-23 jyldardaǵy jylytý maýsymyna strategııalyq taýarlar - Ekibastuz kómiriniń (5877 teńge jetkizýmen) jáne Maıkóbe kómiriniń (12 481 teńge) quny 30 paıyzǵa artty, sondaı-aq kómir tasymaldaý quny (443 mln teńge) ósti. Bul sebepter tarıftik smeta boıynsha jyldyq shyǵyndy arttyrady», - dedi Asqar Nurmaǵanbetov.

Kásiporyn ortasha bosatý tarıfin 15,28 paıyzǵa jáne saralanǵan tarıfter jobasyn ulǵaıtýǵa ótinim berdi.

Sol arqyly jylý tarıfi turǵyndar úshin - 20 paıyzǵa, bıýdjettik uıymdar úshin - 12 paıyzǵa jáne zańdy tulǵalar úshin - 15 paıyzǵa ósti.

Jańa tarıf 2022 jylǵy 1 qazannan bastap qoldanysqa engizile otyryp bekitildi.

«2021 jyldyń qorytyndysy boıynsha tarıftik smeta boıynsha jylý energııasyn óndirýge jumsalǵan naqty shyǵyndar 5,8 mlrd teńgeden asty, al satylǵan jylý energııasy úshin naqty kirister - 3,1 mlrd teńgeni qurady, ıaǵnı kásiporyn tabystyń 32 paıyzyn ala almady. Kásiporynnyń kredıtorlyq bereshegi shamamen 1,5 mlrd teńgeni quraıdy, onyń ishinde 1,3 mlrd - sot talaptary boıynsha bereshek. Bul rette tutynýshylardyń 120 mln teńge mólsherinde debıtorlyq bereshegi bar, onyń ishinde turǵyndardyń ótken jylytý maýsymdary úshin 80 mln teńgeden astam qaryzy bar. Munyń bári kásiporynnyń qyzmeti men qarjylyq-ekonomıkalyq jaǵdaıyna teris áser etedi», - dep tolyqtyrdy Asqar Nurmaǵanbetov.

Aıta ketsek, budan buryn Aqmola oblysynda jylytý maýsymy qashan bastalatynyn jazǵan edik.