Kókshetaýda jol apatynan júrgizýshi men eki bala zardap shekti
Aqmola oblystyq PD baspasóz qyzmetiniń málimetinshe, jol apaty 23 sáýir kúni oblys ortalyǵyndaǵy kópirdiń ústinde bolǵan. Bul týraly sol kúni saǵat 19:20-da «102» jelisine habarlandy.
«Anyqtalǵandaı, Súleımenov kóshesimen soltústik baǵytta júrip kele jatqan Kókshetaý qalasynyń 43 jastaǵy turǵyny júrgizgen «Toıota kamrı 50» avtokóligi joldyń qarsy baǵytyna shyǵyp ketip, «Mazda 323» kóligimen betpe-bet soqtyǵysqan. Saldarynan «Mazda 323» avtokóliginiń 28 jastaǵy júrgizýshisi men salonda bolǵan 2 jáne 4 jastaǵy eki bala túrli dene jaraqatymen aýrýhanaǵa jatqyzyldy», - dedi vedomstvodan.
PD baspasóz qyzmetinen atap ótkendeı, medıtsınalyq saraptama qorytyndysyna sáıkes, «Toıota kamrı 50» avtokóliginiń júrgizýshisi orta dárejeli mas kúıinde bolǵan.
«Tekseris barysynda bul azamattyń 2022 jyly kólik quralyn basqarý quqyǵynan aıyrylǵany anyqtaldy. Avtokólikter arnaıy aıyp turaǵyna qoıyldy. Saraptama taǵaıyndaldy. Sonymen birge, «Toıota kamrı 50» avtokóliginiń júrgizýshisi ýaqytsha ustaý oqshaýlaǵyshyna qamaldy. Qazirgi kezde osy oqıǵaǵa baılanysty Qylmystyq kodekstiń 346-baby 2-bóligi «kólik quraldaryn basqarý quqyǵynan aıyrylǵan jáne alkogoldik, esirtkilik jáne (nemese) ýytqumarlyq masań kúıdegi adamnyń kólik quralyn basqarýy» boıynsha sotqa deıingi tergeý júrgizilip jatyr», - dep tolyqtyrdy vedomstvodan.
Oqıǵa ornynan túsirilgen vıdeo áleýmettik jelide jarııalandy.
Aıta ketsek, budan buryn Aqmola oblysynda 4 jasar balanyń denesi káriz qudyǵynan tabylǵanyn jazǵan edik.