Kókshetaýda joǵalǵan jasóspirim astanadan tabyldy

KÓKShETAÝ. QazAqparat – Kókshetaýda joǵalǵan jasóspirim Astanada júrgen jerinen tabyldy, dep habarlaıdy QazAqparat tilshisi Aqmola oblystyq Polıtsııa departamentiniń baspasóz qyzmetine silteme jasap.

16 jastaǵy Leıla Toıbazar bıylǵy 4 sáýirde saǵat 16:00 shamasynda úıinen shyǵyp ketip, qaıtyp oralmaǵan edi. Ony izdeýge Kókshetaý qalasy polıtsııa basqarmasynyń jeke quramy men eriktiler jumyldyryldy.

Nátıjesinde Aqmola oblystyq Polıtsııa departamenti men Astana qalasy, Saryarqa aýdandyq Polıtsııa basqarmasynyń qyzmetkerleri jasóspirimniń júrgen jerin anyqtady.

«Bıylǵy jyldyń 7 sáýirinde joǵalǵan qyzdy elordalyq tártip saqshylary Astana qalasyndaǵy mekemelerdiń birinde baıqap, aqmolalyq áriptesterine habarlady. Qazirgi ýaqytta kámeletke tolmaǵan qyzdyń ómiri men densaýlyǵyna qaýip tónip turǵan joq. Oqıǵanyń mán-jaıy anyqtalýda», - dedi vedomstvodan.

Aıta ketsek, osyǵan deıin Kókshetaýda iz-túzsiz joǵalǵan 16 jastaǵy qyzǵa izdeý jarııalanǵanyn jazǵan edik.