Kókshetaýda jer qatynastary salasynyń qyzmetkeri alaıaqtyq áreketi úshin sottaldy

KÓKShETAÝ. QazAqparat – Sot Kókshetaý qalasynyń jer qatynastary, sáýlet jáne qala qurylysy bóliminiń sektor meńgerýshisi Ashat Vazırovqa qatysty aıyptaý úkimin shyǵardy, dep habarlaıdy QazAqparat tilshisi.

Aqmola oblysy boıynsha Sybaılas jemqorlyqqa qarsy is-qımyl departamenti baspasóz qyzmetiniń málimetinshe, sot úkimimen oǵan memlekettik qyzmette jáne kvazımemlekettik sektorda qyzmet atqarýǵa ómir boıyna tyıym salyna otyryp, 10 eselengen keltirilgen zalaldyń somasy, ıaǵnı 10 000 000 teńge mólsherinde aıyppul salyndy.

«Vazırov óziniń qyzmettik jaǵdaıyn paıdalana otyryp, aldaý jáne senimge qııanat jasaý jolymen qosymsha jer ýchaskelerin jalǵa alý quqyǵyn berýge járdem kórsetý syltaýymen eki kásipkerlik sýbektisiniń ókilinen jalpy somasy 1 000 000 teńge jymqyrǵany úshin kináli dep tanyldy», - dedi vedomstvodan.

Úkim zańdy kúshine engen joq.

Aıta ketsek, Aqmola oblysynda jer qatynastary salasynyń qyzmetkeri alaıaqtyq kúdigine ilingen bolatyn.