Kókshetaýda JEO salý máselesi pysyqtalyp jatyr

KÓKShETAÝ. QazAqparat - Prezıdent Qasym-Jomart Toqaevtyń tapsyrmasyna sáıkes Energetıka mınıstrligi elektr qýaty naryǵynda jańadan paıdalanýǵa beriletin generatsııalaıtyn qondyrǵylardyń qurylysyna tender ótkizý arqyly Kókshetaýda JEO salý máselesin pysyqtaýda, dep habarlaıdy QazAqparat.

Ázirlengen tehnıkalyq-ekonomıkalyq negizdemege (TEN) sáıkes elektr stantsııasynyń mynadaı tehnıkalyq kórsetkishteri kózdeledi: elektr qýaty – 240 MVt, jylý qýaty – 520 Gkal/saǵ. Qurylystyń jalpy quny 239 mlrd teńgeden asady.

«Qazirgi ýaqytta Energetıka mınıstrligi joba boıynsha tenderlik qujattamany ázirleýde. Energetıka mınıstriniń 2022 jylǵy 4 qazandaǵy № 312 buıryǵymen bekitilgen Jańadan paıdalanýǵa beriletin generatsııalaıtyn qondyrǵylardyń qurylysyna tender ótkizý qaǵıdalarynyń redaktsııasyna sáıkes tenderdi 2023 jylǵy qańtarda ótkizý josparlanǵan», - dep jazdy vedomstvo.

Tender ótkizý týraly habarlandyrý jáne tıisti tenderlik qujattama Energetıka mınıstrliginiń ınternet-resýrsynda qosymsha ornalastyrylady.

Foto: gov.kz