Kókshetaýda JEO qurylysyna ne kedergi bolyp otyr

ASTANA. QazAqparat – Búgin Senattyń jalpy otyrysynda depýtat Nurlan Bekenov Premer-Mınıstr Álıhan Smaıylovtyń atyna joldaǵan saýalynda Aqmola oblysynyń turǵyndaryn mazalap otyrǵan máseleni kóterdi. Atap aıtqanda, Kókshetaý qalasynda jańa jylý elektr ortalyǵyn salý týraly Prezıdent tapsyrmasy oryndalmaı keledi, dep habarlaıdy QazAqparat tilshisi.

Onyń aıtýynsha, qalada 1978 jyly iske qosylǵan qazandyqtar áli kúnge deıin jańartylǵan joq. Kókshetaý qalasynda osyǵan deıin jylý jáne elektr energııasyn óndiretin nysan salynbaǵan.

«Prezıdenttiń 2019 jyldyń qarasha aıynda Aqmola oblysyn áleýmettik-ekonomıkalyq damytý jónindegi keńeste bergen tapsyrmasyna sáıkes, Kókshetaý qalasynda jylý eletr ortalyǵyn salý máselesin qarastyrý tapsyrylǵan bolatyn. Memleket basshysy 2023 jyldyń aqpan aıynda Kókshetaý qalasyna barǵan kezde qala turǵyndaryna bergen ýádeni oryndaý qajet ekenin aıta kelip, JEO salýǵa kirisý týraly aıtqan bolatyn. Bul turǵyda «Prezıdenttiń hattamalyq tapsyrmasy 2019 jyldan beri nege oryndalmaı jatyr?» degen suraq bar», - dedi Nurlan Bekenov.

Depýtattyń sózine qaraǵanda, 2022 jyldyń naýryz aıynyń sońynda JEO qurylysyna tender jarııalandy, biraq sáýir aıynda túsiniksiz sebeptermen onyń kúshi joıylǵan. Energetıka mınıstrligi 2022 jyldyń qyrkúıeginde jańa ereje ázirlep, 2023 jyldyń qańtar jáne aqpan aılarynda tender qaıta jarııalandy, biraq oǵan birde-bir uıym qatysqan joq.

Senator ótkiziletin tenderdiń sharttary ınvestorlarǵa tartymsyz ekenin aıtty.

Bul turǵyda N. Bekenov jobanyń tartymdylyǵyn arttyrý úshin tenderge qatysý erejelerin qaıta qaraý máselesin kóterdi, sondaı-aq tenderdi ótkizý erejesin shuǵyl ózgertý kerek.

Budan buryn habarlanǵandaı,2019 jyldyń 14 qarashasynda Memleket basshysy Qasym-Jomart Toqaevtyń tóraǵalyǵymen Kókshetaýda ótken Aqmola oblysyn damytý jónindegi keńeste oblys ortalyǵynda jylý elektr ortalyǵyn salý máselesi kóterildi.