Kókshetaýda jas aqyndardyń respýblıkalyq baıqaýy ótti

KÓKShETAÝ. QazAqparat – QR Táýelsizdigi merekesi qarsańynda «Azattyǵym-asqaq rýhym!» taqyrybymen jas aqyndardyń respýblıkalyq músháırasy ótti, dep habarlaıdy QazAqparat tilshisi oblystyq ishki saıasat basqarmasyna silteme jasap.

Onlaın rejımde ótken baıqaýda Almaty, Qostanaı, Qaraǵandy, Túrkistan, Kókshetaý, Qyzylorda, Pavlodar qalalarynan jas aqyndar beınekonferentsııa arqyly tóreshilerge óleń-jyrlaryn arnady. Baıqaýǵa tanymal aqyn, halyqaralyq, respýblıkalyq, oblystyq, qalalyq ádebı baıqaýlardyń jeńimpazy Baýyrjan Qaragózuly, fılologııa ǵylymdarynyń doktory Sábıt Jámbek, fılologııa ǵylymdarynyń kandıdaty, dotsent Gúlden Qajybaeva tórelik etti.

«Búgingi is-sharamyzdyń maqsaty ǵasyrlar boıy mura bolyp kelgen halqymyzdyń salt-dástúri men ónerin saqtap, keleshek urpaqqa nasıhattaý», - dedi quttyqtaý sóz sóılegen Kókshetaý qalalyq mádenıet jáne tilderdi damytý bóliminiń basshysy Aıgúl Sábıtova.

Baıqaý qorytyndysy boıynsha, gran-prı júldesine kókshetaýlyq Muhammed Qonqaev ıe bolsa, birinshi oryn pavlodarlyq Baýyrjan Ramazan, ekinshi oryn qostanaılyq Dáýlet Jadyrasyn jáne úshinshi taldyqorǵandyq Ómirbaı Beıbarys-Sultan jeńip aldy. Barlyq qatysýshyǵa Alǵys hat pen estelik syılyqtar úlestirildi.