Kókshetaýda jas aqyndar aıtysy ótti

KÓKShETAÝ. QazAqparat - Kókshetaýda Qazaqstan halqy tilderiniń onkúndigi aıasynda El táýelsizdiginiń 30 jyldyǵyna arnalǵan «Til mártebesi – el mártebesi» taqyrybymen jas aqyndar arasynda aıtys ótti, dep habarlaıdy QazAqparat tilshisi oblystyq ishki saıasat basqarmasyna silteme jasap.

«Dostar» mádenıet saraıynda uıymdastyrylǵan aıtystyń maqsaty - qazaq halyq aýyz ónerin damytý, jas aqyndardyń shyǵarmashylyq bastamalaryn qoldaý, jalpyadamzattyq qundylyqtardy dáripteý.

Jyr dodasynda aqyndar elimizdiń egemendik jyldaryndaǵy jetistikteri men tabystaryn, saıası turaqtylyqty, dostyqty, Qazaqstan halqynyń birligi men kelisimin jyrlady.

Aıtysqa aqyn Arman Berdalın, Kókshetaý qalalyq aqparattyq-kitaphana júıesiniń jetekshisi, aqyn Qýanysh Ospan, «Kókshetaý» gazetiniń bas redaktory, aqyn, jazýshy Serik Jetpisqalıev qazylyq etti. Qazylar alqasynyń sheshimimen bas júldeni Kókshetaýlyq jas aqyn Nurmahan Jaqypbek jeńip aldy.

«Jyr saıysyna qatysyp, jeńimpaz atanǵanyma qýanyshtymyn. Aıtyskerlerdiń árqaısysy sheberlik pen ımprovızatsııanyń joǵary deńgeıin kórsetti. Sharany uıymdastyrýshylarǵa alǵysymdy bildirgim keledi», - dedi Nurmahan Jaqypbek.

Jeńimpazdar men júldegerler dıplom, alǵys hat jáne baǵaly syılyqpen marapattaldy.