Kókshetaýda jármeńkege 70 mln teńgeniń azyq-túlik ónimi shyǵaryldy

KÓKShETAÝ. QazAqparat – Kókshetaýda uıymdastyrylǵan aýyl sharýashylyǵy taýarlarynyń jərmeńkesinde 70 mıllıonǵa jýyq teńgeniń 70 tonna azyq-túlik ónimi saýdaǵa shyǵaryldy, dep habarlaıdy QazAqparat tilshisi.

Oblys ortalyǵyndaǵy Táýelsizdik alańynda uıymdastyrylǵan bul jolǵy jərmeńkege Aqkól, Atbasar, Býrabaı, Zerendi, Birjan sal, Sandyqtaý, Shortandy, Tselınograd aýdandarynyń jáne Kókshetaý qalasynyń, sondaı-aq «KOKЅNE» ÁKK UK» aktsıonerlik qoǵamynyń aýyl sharýashylyǵy taýar óndirýshileri qatysty.

Jármeńkeni aralap kórgen Aqmola oblysynyń ákimi Ermek Marjyqpaev aýdandardan kelgen aýyl sharýashylyǵy taýarlaryn óndirýshilermen, sondaı-aq tutynýshylarmen pikirlesip, turǵyndar kóńilinen shyǵatyn osyndaı sharalardyń aldaǵy ýaqytta da jıi uıymdastyrylyp turatyndaǵyn aıtty.

«Aýa raıynyń qolaısyzdyǵyna qaramastan, búgin oblys ortalyǵyna kelgen barlyq aýdandardyń aýyl sharýashylyǵy taýaryn óndirýshilerge alǵys aıtýymyz kerek. Bul – bıylǵy jyldyń alǵashqy jármeńkesi. Toqsan alty aýyl sharýashylyǵy taýaryn óndirýshi 20 tonnadan astam et, 5 tonnadan astam sút, jarty mıllıonǵa jýyq jumyrtqa tárizdi kóptegen ónimderdi ákeldi. Baǵalaryn ózderińiz kórip otyrǵandaı, naryq pen saýda jelilerine qaraǵanda 10-15 paıyzǵa tómen», - dedi aımaq basshysy basshysy.

Oblystyq aýyl sharýashylyǵy basqarmasynyń málimetinshe, jármeńkege barlyǵy 69,6 mıllıon teńgege 70 tonnadan astam ónim ákelingen.

«Qala turǵyndary men qonaqtaryna jergilikti óndirýshilerdiń 40-tan astam azyq-túlik túri, onyń ishinde et, un, sút ónimderi men balyq, jumyrtqa, qant, kúnbaǵys maıy naryq baǵasynan 15-20 paıyzǵa arzan usynyldy», - dedi vedomstvodan.

Kúnniń yzǵaryna qaramastan, Ramazan aıy men Pasha merekesi bolǵan soń ba, jármeńkege kelgen halyqtyń qarasy qalyń boldy. Aýyldyq jerdiń sapaly taýaryn tańdap alyp júrgender kóp. Jańa soıylǵan, semiz qoı etin túgel arqalap bara jatqandar da boldy.

«Aýyl sharýashylyǵy jármeńkesine únemi kelemin. Bir jaǵynan utymdy saýda jasasaq, ekinshi jaǵynan kontsert tamashalap, án-kúı tyńdap qaıtamyz. Mundaǵy kóńil-kúı qatty unaıdy. Aldaǵy ýaqytta da osyndaı jármeńke jıi uıymdastyrylyp tursa eken», - deıdi qala turǵyny Bereke Jánıenov.

Sonymen birge, jármeńkede Aqmola oblysynyń úzdik kórkemónerpaz ujymdary kontserttik baǵdarlamasyn usyndy.