Kókshetaýda jańa kópir paıdalanýǵa berildi
Nysannyń ashylý rásimine qatysyp, quttyqtaý sóz sóılegen aımaq basshysy Ermek Marjyqpaev M.Ǵabdýllın kóshesiniń boıynda Qylshaqty ózenine salynǵan jańa kópir Qazaqstan Respýblıkasy Tuńǵysh Prezıdenti kúnine laıyqty tartý bolyp otyrǵanyn atap ótti.
«Elimiz úshin mańyzdy merekeler – Tuńǵysh Prezıdent kúni jáne Táýelsizdik kúni qarsańynda jańa kásiporyndardy iske qosý jaqsy dástúrge aınalǵan. Osydan birer kún buryn Tselınograd aýdanynda oblysymyzdaǵy alǵashqy jekemenshik mektep esigin aıqara ashqan edi. Keshe oblys ortalyǵynda «Agrimer-Astyk» JShS-de bıdaıdyń qatty sortynan un shyǵaratyn joǵary tehnologııalyq jańa dıirmen keshenin iske qostyq. Búgin mine, jańa kópirdi qala turǵyndarynyń ıgiline berip otyrymyz», – dedi aımaq basshysy.
Bul - Kókshetaý qalasynda sońǵy 50 jylda alǵash ret salynyp otyrǵan jańa kópir. Jobanyń jalpy quny - shamamen 450 mıllıon teńge. Qurylys jumystaryn qaraǵandylyq «Servıs SST» kompanııasy 2018 jyly qolǵa alyp, bıyl aıaqtaǵan. Kópirdiń uzyndyǵy - 65 metr, eni - 33 metr. Atalmysh kópir ornatylǵan Ǵabdýllın kóshesi Abylaı han dańǵyly men Ýálıhanov kóshesin baılanystyrady.
Sonymen qatar, kópirdiń ashylý rásiminde Kókshetaý qalasynyń qurmetti azamaty Bolat Janádilov sóz alyp, qala turǵyndaryn Tuńǵysh Prezıdent kúni merekesimen quttyqtady.