Kókshetaýda volonterler utyp alǵan grantyna zeınetkerlerdiń úıin jóndep júr

KÓKShETAÝ. QazAqparat - Kókshetaýlyq volonterler utyp alǵan grantyn jalǵyzbasty zeınetkerlerdiń úıin jóndeýge jumsady, dep habarlaıdy QazAqparat tilshisi.

18 jastaǵy Aıza Myńjasarova – ótken jyldyń qazan aıynda Kókshetaýda qurylǵan «Rahat» volonterler klýbynyń ókili. Bul klýbtyń barlyq qatysýshysy, onyń ishinde Aıza da J.Mýsın atyndaǵy pedagogıkalyq kolledjde bilim alady.

Aızanyń aıtýynsha, klýbta jumys isteıtin volonterlerdiń sany - 10-15 adam. Alaıda, jalǵyzbasty zeınetkerlerge kómek kórsetýge arnalǵan grantty ol «Jylý syılaımyz» atty jobasy arqyly utyp alǵan.

«Biz semınarǵa qatystyq, onda 68 grant usynyldy. Men oılana kele óziminiń «Jylý syılaımyz» jobasyn jasap, baıqaýǵa qatystym. Biz jalǵyzbasty qarııanyń úıine baryp, jóndeý jumystarynyń qajettiligin zerttedik. Qarttyń úıinde tereze joq eken. Keıin maǵan grant utym alǵanymdy aıtty», - deıdi Aıza.

Grant qarjysy ekinshi transhpen bólindi. Onyń alǵashqysy 150 teńgesine volonterler jalǵyzbasty qarııanyń úıine sanıtarlyq torap, «rakovına», sý jylytqysh ornatyp beripti.

«Birinshi transhqa bólingen aqshaǵa qurbym ekeýimiz qajetti santehnıkalyq zattardy satyp aldyq ta, ony ornatý úshin jumysshylardy jaldadyq. Ekinshi transh boıynsha taǵy 150 myń teńge bólinýi tıis. Buǵan qarııanyń úıine plastık tereze ornatamyz», - dep tolyqtyrdy Aıza.

Ol muqtaj jandardyń málimetterin Jastar resýrstyq ortalyǵynan surap alǵan.

Volonterler budan bólek, naýqas balalardyń emdelýine qarjy jınap, qarttar úıine baryp kómektesip turady.