Kókshetaýda vetınspektor et jetkizýshiden para aldy degen kúdikke ilindi
Aqmola oblysy boıynsha sybaılas jemqorlyqqa qarsy is-qımyl departamenti baspasóz qyzmetiniń málimetinshe, jıynda para alý deregi boıynsha Kókshetaý qalasynyń memlekettik veterınarııalyq-sanıtarııalyq ınspektorlarynyń birine qatysty qylmystyq is sheńberinde Qylmystyq protsessýaldyq kodekstiń 200-babynyń tártibimen engizilgen usynys qaraldy.
«Sotqa deıingi tergeý barysynda memlekettik qyzmetshi qalalyq bazar aýmaǵyna veterınarııalyq anyqtamasyz mal etin kedergisiz ákelgeni úshin jetkizýshiden para alǵany anyqtaldy. Qazirgi ýaqytta qylmystyq is sotta qaralyp jatyr. Osyndaı quqyq buzýshylyqtarǵa jol bermeý maqsatynda QR zańnamasyn buzýǵa jol bergen kináli tulǵalarǵa tártiptik sıpattaǵy qatań sharalar qoldaný, ujymdarda tıisti túsindirý jumystaryn uıymdastyrý, sondaı-aq sybaılas jemqorlyqqa qarsy monıtorıng jáne sybaılas jemqorlyq táýekelderine ishki taldaý júrgizý usynyldy», - dedi vedomstvodan
Sybaılas jemqorlyqqa qarsy is-qımyl departamentiniń basshysy Arman Rahımov jıynǵa qatysýshylarǵa sybaılas jemqorlyqqa qarsy is-qımyl máseleleri boıynsha mańyzdy zańnamalyq túzetýlerdi túsindirip, veterınarııalyq baqylaý jáne qadaǵalaý júıesinde sheshilmegen túıitkildi máselelerdiń bar ekendigin atap ótti.
Tek sońǵy 3 jylda oblystyq jemqorlyqqa qarsy qyzmettiń óndirisinde atalǵan salaǵa qatysty 25 qylmystyq is bolǵan.
«Óńirdiń veterınarııalyq qyzmetiniń mamandary sybaılas jemqorlyq quqyq buzýshylyqtardy júıeli túrde jasaıdy. Bul sybaılas jemqorlyqtyń aldyn alý boıynsha júrgizilip jatqan formaldyq jumystyń dáleli. Aýmaqtyq ınspektsııalar basshylyǵy tıisti baqylaýdy qamtamasyz ete otyryp, keshendi aldyn alý sharalaryn kúsheıtýi qajet. Qyzmetkerlerdiń sybaılas jemqorlyq quqyq buzýshylyq jasaǵany jáne sybaılas jemqorlyqtyń aldyn alý sharalaryn qoldanbaǵany úshin basshylar derbes jaýap beretinin eske salamyn», - dep atap ótti Arman Rahımov.