Kókshetaýda uıymdasqan top memleketke 184 mıllıon teńge shyǵyn keltirgen - QMA

NUR-SULTAN. QazAqparat - Qarjylyq monıtorıng agenttiginiń Aqmola oblysy boıynsha departamenti jalǵan shot-faktýralardy berýmen aınalysqan uıymdasqan top qurý jáne ony basqarý faktisi boıynsha qylmystyq isti aıaqtady, dep habarlaıdy QazAqparat.

Uıymdasqan qylmystyq top Kókshetaý qalasynda 2016 jyldyń aqpan aıynan 2019 jyldyń shilde aıyna deıingi aralyqta óz qyzmetin júzege asyrǵan kezeńde múliktik paıda alý maqsatynda kontragent kásiporyndarǵa taýarlardy jetkizbeı, jumystardy oryndamaı, qyzmetterdi kórsetpeı, birneshe ret jalǵan shot-faktýralar bergen.

Keıin zańsyz jolmen alynǵan qarajat uıymdasqan qylmystyq top músheleri arasynda taratylǵan.

Salyq tóleýden jaltarý arqyly «Fırma Stroınvest Astana» JShS, «Alad-Kókshe» JShS memleketke jalpy somasy 184 mıllıon teńgeden astam shyǵyn keltirgen.

Sot úkimimen kináliler jazasyn ortasha qaýipsizdiktegi qylmystyq-atqarý júıesi mekemesinde óteý arqyly qylmystyq jolmen tabylǵan somadaǵy qarajaty tárkilenip, 5 jylǵa bas bostandyǵynan aıyryldy.