Kókshetaýda úıinen ketip qalǵan jasóspirim bes kún boıy Petropavl kóshelerinde túnegen

KÓKShETAÝ. QazAqparat - Bes kún buryn joǵalǵan 15 jasar kókshetaýlyq jasóspirim Petropavl qalasynan tabyldy, dep habarlaıdy QazAqparat tilshisi.

Aqmola oblystyq polıtsııa departamenti baspasóz qyzmetiniń málimetinshe, maýsymnyń 1-de Kókshetaý qalalyq polıtsııa basqarmasyna jergilikti turǵyn habarlasyp, 15 jasar uly joǵalǵanyn aıtqan.

Er adamnyń sózinshe, uly úıinen shyǵyp, qaıtyp oralmaǵan. Otbasynda jasóspirim ketip qalatyndaı urys-keris te bolmaǵan.

Biraq bozbala osyǵan deıin de úıinen ketip qalyp júrgen.

«Anyqtalǵandaı, jasóspirim Soltústik Qazaqstan oblysyna InDriver taksıimen ketip qalǵan. Sol kúni tártip saqshylary dereý júrgizýshimen radıobaılanysqa shyǵyp, kámeletke tolmaǵan bala úshin jaýapkershilik baryn eskertti. Alaıda, Petropavlǵa jetken boıda jasóspirim kólikten túsip ketip qaldy», - dedi vedomstvodan.

Departamenttiń baspasóz qyzmetinen atap ótkendeı, jasóspirim birneshe kún boıy Petropavl kóshelerin kezip júrgen.

«Qolyndaǵy telefonyn satyp, azyq-túlik satyp alǵan. Al, túnde qamysta túnegen. Ol óziniń úıden ne sebepti ketkenin túsindire almady. Qazirgi kezde bala týystaryna tapsyryldy. Ata-anasy jáne jasóspirimniń ózimen profılaktıkalyq áńgime ótkizildi», - dep tolyqtyrdy vedomstvodan.

Aıta ketsek, osyǵan deıin Aqmola oblysynda 42 jastaǵy áıel iz-túzsiz joǵalǵan bolatyn.