Kókshetaýda taǵy bir onkologııalyq ortalyq salynady
Aqmola oblystyq densaýlyq saqtaý basqarmasy baspasóz qyzmetiniń habarlaýynsha, jyl saıyn dúnıejúzinde 10 mıllıonnan astam adam onkologııa dertine shaldyǵady eken. Aqmola oblysy boıynsha bul kórsetkish 1800 adamnan asady.
Qazirgi kezde, oblys ortalyǵynda jalǵyz onkologııalyq dıspanser bar. Ambýlatorııalyq jáne statsıonarlyq naýqastar osyndaǵy bir ǵana dıagnostıkalyq apparatta tekserilýde. Tipti keıbir naýqastar amalsyzdan tolyq tekseristen ótý úshin kórshi oblystarǵa barýǵa májbúr.
Sondyqtan, bul problemany sheshý úshin jáne onkologııalyq aýrýlardy aldyn ala anyqtaý maqsatynda respýblıkalyq bıýdjetten 2 mıllıard teńgeden astam qarjy bólindi. Oǵan 150 kelýshige arnalǵan onkologııalyq emhana salý kózdelip otyr.
«Jańa emhananyń ashylýy bul dertti aldyn ala anyqtaýǵa múmkindik beredi. Al, bul óz kezeginde naýqastardyń ómirin uzartýǵa septigin tıgizedi», - dep túsindirdi Aqmola oblystyq onkologııa aýrýhanasynyń bas dárigeriniń uıymdastyrý-ádisteme jumystary jónindegi orynbasary Tatıana Zınoveva.
Bul jobany júzege asyrý turǵyndarǵa sapaly, joǵary deńgeıde medıtsınalyq kómek kórsetýge múmkindik beredi. Ǵımarat 4 qabattan turatyn bolady. Keshen zamanaýı medıtsınalyq quraldarmen jabdyqtalady. Osynyń arqasynda onkologııalyq aýrýlardy aldyn ala anyqtaýǵa jáne osy dertten kóz jumatyn adamdardyń sanyn azaıtýǵa qoljetkizilmek.