Kókshetaýda sý basqan úılerdiń turǵyndaryn qutqarýshylar qaıyqpen jáne jaıaý arqalap shyǵaryp jatyr

<p>KÓKShETAÝ.&nbsp; KAZINFORM&nbsp; - Kókshetaý qalasynda Qylshaqty ózeniniń arnasynan asyp ketýine baılanysty 8 jeke úıdi sý basty, sondaı-aq,&nbsp; 28 jeke úıdiń jáne 7 kópqabatty turǵyn úıdiń aýlasy sý astynda qaldy.</p>

Aqmola oblysy TJD baspasóz qyzmetiniń málimetinshe, qazirgi ýaqytta Qylshaqty ózeniniń jaǵalaýyn nyǵaıtý jumystary júrgizilip jatyr, ıaǵnı 280 tonna ınertti materıal tóselip, 150 m jaǵalaý nyǵaıtyldy. Sonymen birge 110 m kanal men aryqtar keńeıtilip, tereńdetildi. Nysandardyń aınalasyna qum salynǵan 310 qap tóseldi, 1000 astam tekshe metr sý soryldy. 

Foto: TJD baspasóz qyzmeti

Sý basý qaýpi bar ýchaskelerinde polıtsııa jáne jergilikti atqarýshy organdardyń qyzmetkerlerinen kezekshilik uıymdastyryldy. Sý tasqynymen kúresý úshin TJD jeke quramnyń 59 adam jáne 4 birlik tehnıka, 9 motopompa, azamattyq qorǵaý akademııasynan 63 adam, 2 birlik tehnıka, PD jeke quramnan 7 adam jáne 7 birlik tehnıka, JAO 126 adam, 64 birlik tehnıka, 10 birlik motopompa jumyldyryldy. Bul baǵyttaǵy jumystar jalǵasyp jatyr. 

Foto: TJD baspasóz qyzmeti

Aıta ketsek, budan buryn Kókshetaýda Qylshaqty ózeni arnasynan asyp, temirjol vokzaly mańyn sý basqanyn jazǵan edik. 

Foto: TJD baspasóz qyzmeti