Kókshetaýda stýdenttik assambleıalar festıvali ótti
Sharaǵa jergilikti joǵary oqý oryndary men kolledjderdiń stýdentteri qatysty. Búgingi kúni atalmysh bilim ordalarynda stýdenttik ortada etnosaralyq kelisim men toleranttylyqty nyǵaıtý, demokratııalyq normalarǵa súıenetin stýdentterdiń saıası-quqyqtyq mádenıetin qalyptastyrý úshin qolaıly jaǵdaı jasaý maqsatynda Stýdenttik Assambleıalar qurylyp, jumys isteýde.
Bul jolǵy sharanyń maqsaty - jastardyń belsendi ómirlik ustanymdaryn qalyptastyrý, jastardyń ózindik shyǵarmashylyǵyn damytý, stýdentter arasynda dostyq jáne iskerlik baılanystardy ornatý.
«Festıval barysynda 7-10 adamnan turatyn komandalar bes baıqaý boıynsha synǵa tústi. Aldymen komandalar ózderin tanystyrsa, keıin «Qazaqstan halqy Assambleıasy mınıatıýrada» atty teatrlandyrylǵan qoıylymyn kórsetip, «Intellektýaldyq vıktorına» suraqtaryna jaýap berdi. Sonymen birge, «Eger men etnomádenı birlestiktiń jetekshisi bolsam ...» kapıtandar saıysynda jarysty jáne sońynda taqyryptyq mýzykalyq nómirin kórsetti», - deıdi «Qoǵamdyq kelisim» baspasóz qyzmetindegiler.
Saıystarda qatysýshylar bilimderin, erýdıtsııasyn ǵana emes, shyǵarmashylyq, mýzykalyq qabiletterin, tapqyrlyǵyn, naǵyz kóńildi tapqyrlar retindegi joǵary oryndaýshylyq sheberlikterin kórsetý kerek boldy. Dál osy krıterııler boıynsha qazylar alqasy komandalardyń ónerin baǵalady. Qazylar alqasynyń sheshimimen birinshi, ekinshi jáne úshinshi oryndardy sáıkesinshe, Kókshetaý tehnıkalyq ınstıtýty, A.Myrzahmetov atyndaǵy Kókshetaý ýnıversıteti jáne Sh.Ýálıhanov atyndaǵy KMÝ komandalary ózara bólisti.
Al, Aqmola oblysynyń ákimi, Qazaqstan halqy Assambleıasy tóraǵasynyń Gran-prı júldesine Gýmanıtarlyq-tehnıkalyq akademııasynyń komandasy laıyq dep tanyldy. Qatysýshylar baǵaly syılyqtarymen marapattaldy.