Kókshetaýda stýdentter úshin bos oryndar jármeńkesi ótti

KÓKShETAÝ. QazAqparat - Kókshetaýda 50 jumys berýshiniń qatysýymen stýdentterge arnalǵan bos jumys oryndarynyń jármeńkesi uıymdastyryldy, dep habarlaıdy QazAqparat tilshisi Aqmola oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamentiniń baspasóz qyzmetine silteme jasap.

Vedomstvonyń málimetinshe, jármeńkege memlekettik jáne quqyq qorǵaý organdarynyń, bank salasynyń, kvazımemlekettik sektordyń qyzmetkerleri tartyldy. Jalpy, jármeńkege óńirdegi 50-den astam jumys berýshi qatysyp, stýdentterge bos oryndardy usyndy.

«Bul sharanyń basty maqsaty - keleshek mamandardyń kásibı ıkemdiligin arttyryp, jumysqa ornalasýyna jaǵdaı jasaý. Ásirese, sońǵy kýrs stýdentteri úshin tıimdi. Olar eńbek naryǵyndaǵy jaǵdaımen tanysyp, jas mamandardy áleýmettik qoldaý sharalary týraly bile alady. Sonymen qatar, bul jármeńke memlekettik qyzmet jáne quqyq qorǵaý organdary, bank salasyndaǵy jumys berýshilerdiń jas, talantty jáne básekege saı kásibı mamandardy jumysqa shaqyrýyna múmkindik beredi», - deıdi Aqmola oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamentiniń basqarma basshysy Gúlmıra Evnıeva.

Departament ókilderi jastarǵa memlekettik qyzmetke ornalasý tártibi, testileý baǵdarlamasy men erejesin túsindirip berdi. Al stýdentter jumys berýshilermen júzdesip, keleshek jumys oryndary týraly surap bildi.

Jalpy, bul jolǵy bos jumys oryndary jármeńkesine sońǵy kýrsta oqıtyn 925 stýdent qatysty.