Kókshetaýda Shoqan Ýálıhanov murasyna arnalǵan halyqaralyq konferentsııa ótti

KÓKShETAÝ. QazAqparat - Búgin Shoqan Ýálıhanov atyndaǵy Kókshetaý memlekettik ýnıversıtetinde Qazaq halqynyń tuńǵysh aǵartýshy ǵalymy Shoqan Ýálıhanovtyń 185 jyldyǵyna arnalǵan «Shoqan oqýlary - 24» taqyrybynda halyqaralyq ǵylymı-praktıkalyq konferentsııa ótti, dep habarlaıdy QazAqparat tilshisi oblystyq ishki saıasat basqarmasyna silteme jasap.

Erekshe formatta ótken onlaın konferentsııaǵa Aqmola oblysy ákiminiń áleýmettik máseleler jónindegi orynbasary Aına Mysyrálimova qatysyp, quttyqtaý sóz sóıledi.

Konferentsııaǵa elimizdiń jáne taıaý shyǵys elderinen, sondaı-aq Vengrııa, Mońǵolııa, Reseıdiń belgili ǵalymdary belsendi túrde qatysyp, óz tájirıbelerin bólisti.

Mańyzy zor taǵylymdy konferentsııaǵa 300-den astam ǵylymı maqala usynylyp, 4 tomnan turatyn elektrondy formatta jınaq shyǵaryldy.

Aǵartýshy ǵalymnyń qurmetine arnalǵan ǵylymı konferentsııanyń plenarlyq otyrysynda qazaqstandyq jáne Reseıdiń tanymal ǵalymdary tyń zertteýlerimen kelip, maǵynaly da mańyzdy baıandamalar jasady.

Atap aıtsaq, Sh. Ýálıhanov atyndaǵy KMÝ professory, tarıh ǵylymdarynyń doktory Qadyrjan Ábýov «Shoqan Ýálıhanovtyń Peterbýrgtegi ómirinen qyzyqty faktiler», Almaty qalasyndaǵy Sh. Ýálıhanov atyndaǵy Tarıh jáne etnologııa ınstıtýtynyń dırektory, tarıh ǵylymdarynyń doktory, professor Zııabek Qabyldınov «Qazaqtyń uly hany Abylaıǵa baılanysty tyń muraǵattyq derekter», Omby memlekettik pedagogıkalyq ýnıversıtetiniń professory, tarıh ǵylymdarynyń doktory Mıhaıl Chýrkın «Uly Dala halqynyń XIX-XX ǵasyrlardaǵy saıası ómiri», Túmen memlekettik ýnıversıteti Geoekologııa jáne tabıǵatty paıdalaný kafedrasynyń meńgerýshisi, bıologııa ǵylymdarynyń doktory, dotsent Anna Sındırevanyń erekshe qyzyqty baıandamasy, Sh.Ýálıhanov atyndaǵy KMÝ dotsenti, fılologııa ǵylymdarynyń kandıdaty Sábıt Jámbek «Epostanýdaǵy Shoqannyń ǵylymı ustanymdary» taqyrybyndaǵy tyń zertteýleri boıynsha jazylǵan taǵylymdy baıandamalary konferentsııa qatysýshylaryn erekshe tolǵandyrdy.

Shara barysynda elimizdegi birqatar joǵary oqý oryndarynyń ustazdary men jas ǵalymdary konferentsııa qatysýshylaryna saýaldaryn qoıyp, jaýap aldy.

Ásirese Shoqannyń Parıjge sapary, ǵalymnyń Syrymbette dúnıege kelýi, Uly Dala halqynyń mádenıeti, Shoqan Ýálıhanov tulǵasyn zerttegen ǵalymdar týraly, ári Shoqannyń ádebıettanýshy ǵalym ekendigi týraly tolyq zerttelip, áli de bolsa naqty aıtylmaı júrgen jaqtaryna basa nazar aýdaryldy.