Kókshetaýda sarbazdardyń jappaı aýrýhanaǵa túsýine baılanysty qyzmettik tekseris bastaldy

KÓKShETAÝ. QazAqparat - Kókshetaýdaǵy 5510 áskerı bólimshe sarbazdarynyń jappaı aýrýhanaǵa túsýine baılanysty qyzmettik tekseris bastaldy, dep habarlaıdy QazAqparat tilshisi «Ortalyq» óńirlik qolbasshylyǵynyń baspasóz qyzmetine silteme jasap.

Vedomstvonyń málimetinshe, qazirgi kezde atalmysh áskerı bólimshede qalǵan áskerı qyzmetshilerdiń arasynda emdeý-aldyn alý is-sharalary júrgizilip jatyr. Qyzmetkerlerdiń ál-aýqatyna qatysty jańa shaǵymdar túsken joq.

«Osy derek boıynsha qyzmettik tekseris júrgizilýde», - dep atap ótti vedomstvodan.

Aıta ketsek, budan buryn Kókshetaýdaǵy 5510 áskerı bólimsheniń 40-tan astam áskerı qyzmetshisi JRVI (jedel respıratorly vırýsty ınfektsııa) belgilerimen juqpaly aýrýlar ortalyǵyna jatqyzylǵanyn jazǵan edik. Olardyń 5-nen mınıngokty ınfektsııaǵa reakatsııa oń bolyp shyqsa, 4-nen enterovırýsty, qalǵandarynan respıratorly ınfektsııa anyqtaldy.

Keıin QR Densaýlyq saqtaý mınıstri Ajar Ǵınııat aýrýhanaǵa jatqyzylǵan sarbazdardyń jaǵdaıy týraly aıtqan edi.