Kókshetaýda «Rýhanı jańǵyrý» baǵdarlamasynyń 2 jyldyǵy atalyp ótti
Shara Kókshetaý qalalyq kitaphanasynda «Rýhanı jańǵyrý» zalynyń ashylýymen bastaldy. Onda Elbasynyń «Bolashaqqa baǵdar: qoǵamdyq sanany jańǵyrtý» jáne «Uly dalanyń jeti qyry» baǵdarlamalyq maqalasy aıasyna ótken sharalar men halqymyzdyń Uly tulǵalary áskerı qolbasshylar men saıası qaıratkerler Kúltegin, Sultan Beıbarys, Kenesary jáne Birjan sal, Úkili Ybyraı, Abaı Qunanbaev, Estaı Myrzahmetov sııaqty birtýar uldarynyń portretteri qoıyldy.
Budan bólek elimizdiń arheologııa jáne tarıhy boıynsha eńbekter, Tuńǵysh Prezıdenttiń kitaby, sondaı-aq, qazaq tili boıynsha lıngvıstıkalyq ádebı kitaptar usynyldy.
Sharaǵa Qazaqstan halqy Aqmola assambleıasy Analar keńesiniń tóraıymy Zere Qıyqova, Kókshetaý qalalyq mádenıet jáne tilderdi damytý bóliminiń basshysy Aıgúl Sábıtova, kitaphana ujymy qatysty.
«Elimiz úshin aıtýly eki oqıǵaǵa baılanysty eki zaldy ashý óskeleń urpaqty tábıeleýde mańyzy zor», dedi Kókshetaý qalasynyń qurmetti turǵyny, pedagogıka salasynyń ardageri Kúlásh Temirbekova.
«Kitaphanaǵa qala mektepterindegi oqýshylar kelip, ózderiniń shyqqan tegi, týǵan jeri men ólkesi týraly mol maǵlumat alyp qana qoımaıdy, patrıottyq tárbıeni de sanasyna sińiredi», deıdi ol.
Shara «Neke Sarai'y» saraıynda jalǵasty. Onda shaǵyn etnoaýyldar uıymdastyryldy. Kıiz úılerde óńirdegi ár ult ókilderi qazaq halqynyń salt-dástúri, ádet-ǵurpyn jınalǵandarǵa pash etti.
Shara qonaqtaryna Kókshetaý qalasynyń ákimdigi men Analar keńesi jáne Ákeler keńesi qyzyqty da, tartymdy shara uıymdastyrdy.
Sharada «Aqmola-Tirshilik» JShS-i dırektory, jazýshy, dramatýrg Jabal Erǵalıev, Shoqan Ýálıhanov atyndaǵy Kókshetaý memlekettik ýnıversıtetiniń prorektory Amanaı Seıitqasymov pen professory Shalabaı Berdibaı, sondaı-aq, jastar men azamattyq qoǵam ınstıtýttarynyń ókilderi qatysyp, Aqmola oblysynda Elbasynyń «Rýhanı jańǵyrý» baǵdarlamalyq maqalasy men onyń jalǵasy «Uly dalanyń jeti qyrynda» aıtylǵan mindetterdi júzege asyrý týraly pikir almasty.