Kókshetaýda Prezıdenttiń saılaýaldy tuǵyrnamasyn iske asyrý máselesi talqylandy

KÓKShETAÝ. QazAqparat - Oblys ákimi Ermek Marjyqpaevtyń tóraǵalyǵymen Qazaqstan Respýblıkasynyń Prezıdenti Qasym - Jomart Toqaevtyń saılaýaldy baǵdarlamasyndaǵy mindetterdi talqylaý boıynsha oblys aktıviniń májilisi ótti, dep habarlaıdy QazAqparat tilshisi.

Jıynǵa Aqmola oblystyq máslıhattyń depýtattary, aýdandar men qalalardyń ákimderi, quqyq qorǵaý organdarynyń, oblystyq basqarmalar men departamentterdiń, ónerkásip kásiporyndarynyń basshylary, bıznes, bilim berý salasynyń, saıası partııalardyń, Qazaqstan halqy Aqmola assambleıasynyń, «Atameken» respýblıkalyq kásipkerler palatasynyń, úkimettik emes uıymdardyń, kásipodaqtardyń, jastar uıymdarynyń jáne buqaralyq aqparat quraldarynyń ókilderi qatysty.

Alqaly jıynda aımaq basshysy Ermek Marjyqpaev Memleket basshysynyń mańyzdy on baǵyty qujattynda bárimizdiń aldymyzǵa aıqyn da, abyroıly mindetterdiń qoıylǵandyǵyn, ony júzege asyrýǵa aqmolalyqtardyń bar kúsh-jigerlerin jumsaıtyndyqtaryn jetkizdi.

«Prezıdenttiń basty on baǵytyndaǵy árbir pýnkt, árbir tapsyrma naqty máseleler, naqty úmit pen turǵyndardyń suranysyna negizdeledi. Bizdiń mindetimiz Memleket basshysy júktegen tapsyrmalardy qysqa ýaqyt ishinde oryndaý», - dep atap ótti Ermek Marjyqpaev.

Sondaı-aq, jıynda sóz alǵan Tselınograd aýdany Qosshy aýyldyq okrýginiń jergilikti qoǵamdastyq jınalysynyń tóraǵasy Aıdyn Tórebaev, «Órleý» biliktilikti kóterý ulttyq ortalyǵynyń» AQ Aqmola oblystyq fılıalynyń dırektory Nına Stýkalenko, Aqmola oblystyq sotynyń tóraǵasy Dosjan Ámirov, jeke kásipker Sergeı Shmakov jáne «Aqmola - adaldyq alańy» jobalyq keńsesiniń basshysy Samıra Taıtenova Memleket basshysyn bir kisideı qoldap, mańyzdy qujatta naqtylap bergen baǵyt-baǵdardy júzege asyrýǵa jumylatyndyqtaryn tilge tıek etti.

Eske salsaq, Memleket basshysy Qasym-Jomart Toqaev óziniń saılaýaldy tuǵyrnamasyn júzege asyrý jónindegi is-qımyl Josparyn bekitken bolatyn.