Kókshetaýda ótken jármeńkede 104 tonna azyq-túlik saýdaǵa shyǵaryldy

KÓKShETAÝ. QazAqparat - Kókshetaý qalasynda Arshaly, Aqkól, Býrabaı, Egindikól, Ereımentaý, Shortandy, Qorǵaljyn, Tselınograd aýdandary men oblys ortalyǵynyń aýyl sharýashylyǵy taýar óndirýshileri jáne «Kókshe» áleýmettik kásipkerlik korporatsııasy» aktsıonerlik qoǵamynyń qatysýymen azyq-túlik jármeńkesi ótti, dep habarlaıdy QazAqparat tilshisi.

Táýelsizdik alańynda uıymdastyrylǵan jármeńkege óńirdiń 90-nan astam aýyl sharýashylyǵy taýar óndirýshileri jalpy quny 68,1 mıllıon teńge bolatyn 104,3 tonnaǵa jýyq ónim ákeldi.

Jármeńkede azyq-túlik ónimderi naryq baǵasynan 10-15 paıyzǵa arzan satyldy.

Sonyń ishinde 24,7 tonna et jáne shujyq ónimi, 3,4 tonna balyq, 7,3 tonna sút jáne sút ónimi, 272 dana jumyrtqa, 5,1 tonnadan astam un, 4 tonna ósimdik maıy, 58,8 tonna kartop pen kókónis jáne ózge de ónimder bar.

Jármeńkeni arnaıy baryp kórgen Aqmola oblysy ákiminiń orynbasary Ǵalymjan Ábdihalyqov azyq-túlik baǵasy men sapasyna nazar aýdardy.

«Kókshe» áleýmettik kásipkerlik korporatsııasy» aktsıonerlik qoǵamynyń sórelerinde kúnbaǵys maıynyń lıtri - 390 teńge, tazalanǵan kúrishtiń kelisi - 280 teńge, qaraqumyq jarmasy - 267 teńge, qanttyń kelisi - 200 teńge, 1 kg birinshi sortty un - 110 teńge, joǵary sortty unnyń eki kelisi 500 teńge boldy.⠀

Pavılondarda oblystyq taýarlar men qyzmetterdiń sapasy jáne qaýipsizdigin baqylaý departamentiniń, ulttyq saraptama ortalyǵynyń mamandary azyq-túlik ónimderinen synama alyp tekserip, sanıtarlyq talaptardyń saqtalýyna erekshe kóńil bóldi.