Kókshetaýda órt shyqqanyn Smart National Park Burabay júıesi anyqtaǵan

ASTANA. QazAqparat - Kókshetaýda tutanǵan tilsiz jaý aýyzdyqtaldy. Aldyn ala derekter boıynsha, «Býrabaı» memlekettik ulttyq tabıǵı parkinde 300 sharshy metr jerdi jalyn sharpydy, dep habarlaıdy QazAqparat QR Tótenshe jaǵdaılar mınıstrliginiń baspasóz qyzmetine silteme jasap.

Taýdaǵy tastardyń asty áli de byqsyp jatqandyqtan, Tótenshe jaǵdaılar mınıstrliginiń órt sóndirýshileri men «Býrabaı» MUTP qyzmetkerleri oqıǵa ornynda jumys istep jatyr. Tolyq sóndirýge taǵy biraz ýaqyt ketýi múmkin, odan keıin qaıta tutanbaýy úshin sol mańaı baqylaýǵa alynady.

Búgin tańǵy 6:50-de orman órtin erte anyqtaıtyn Smart National Park Burabay júıesi 897 metr bıikte tútin shyǵyp jatqanyn «baıqap», dıspetcherlerge habar bergen.

Ulttyq parktiń barlyq jeri joǵary dáldikti optıkalyq sensory bar kameramen baqylanady. Bul kameralardyń sholý buryshy 360°. Kúndiz ashyq keńistiktegi tútindi birden kóretin júıeniń datchıkteri avtomatty túrde iske qosylsa, qarańǵy túskende teplovızor arqyly jumys isteıdi.

«Aqyldy» júıe órt shyqqan jerdiń koordınattaryn, qaýip-qater deńgeıin dál anyqtap, tótenshe qyzmetterge tez arada habar berýge jáne órt sóndirý kólikteriniń oqıǵa ornyna eń yńǵaıly jolmen jetýine jaǵdaı jasaıdy.

«Smart-júıeden belgi túsisimen birden dabyl qaǵylyp, tótenshe qyzmetter iske kiristi. Aldymen Ulttyq parktiń ınspektorlary órt sóndiretin qol quraldaryn alyp jaıaý jetti. Artynsha olarǵa Aqmola oblysy Býrabaı aýdanynyń tótenshe jaǵdaı bólimi, Avıa órt sóndirý qyzmeti kómekke keldi. «Býrabaı» ulttyq parkiniń, Tótenshe jaǵdaı qyzmetiniń, ákimdiktiń tıisti mamandarynyń birlesip áreket etýiniń arqasynda 2 jarym saǵat ishinde, ıaǵnı 11-den 13 mınýt ketkende jalyn tolyq aýyzdyqtaldy», - dep habarlady Ulttyq parktiń Jedel basqarý ortalyǵynyń jetekshisi Asylhan Ahmetjanov.

Tilsiz jaýdyń betin qaıtarýǵa Ulttyq parktiń 70 qyzmetkeri, Býrabaı aýdanynyń tótenshe jaǵdaı bóliminiń 96 adamy, Avıa órt sóndirý qyzmetiniń 4 mamanyn qosa alǵanda barlyǵy 200-den adam qatysyp, 14 órt sóndirý kóligi jumyldyryldy. Tehnıkanyń jeteýi – ulttyq parkke, beseýi – aýdandyq tótenshe jaǵdaı bólimine tıesili.

Tilsiz jaýdyń taralýyna jol bermeý úshin «Qazavıaqutqarý» AQ tikushaqtary 14 ret sý shashty. Aýmaqty zertteý úshin «Qazaq ormandardy avıatsııalyq qorǵaý» RMQK tikushaǵy da tartyldy. Órttiń shyǵý sebebi men kelgen zalaldar týraly resmı qorytyndy oqıǵa tolyq zerttelgennen keıin beriledi.

Órtti tez anyqtaıtyn avtomatty júıe jasandy ıntellekt negizinde qurastyrylǵan. Ol jazyq dalada nemese ormandy jerlerde tilsiz jaýdy tez arada anyqtaýǵa kómektesedi.

Ulttyq park aýmaǵynda Smart National Park Burabay júıesiniń joǵary dáldikti kameralarmen jabdyqtalǵan 13 antennaly dińgegi bar. Ol «Býrabaı» MUTP terrıtorııasyn túgel (129 299 ga) túgel qamtyp, irgeles ornalasqan qorǵalatyn aýmaqtardy da baqylap otyrýǵa jol ashty.

Buǵan deıin aıtylǵandaı, jyl basynan beri Býrabaıda órtke qarsy júıeniń arqasynda dala men ormannan shyqqan 18 órt tez anyqtaldy. Ulttyq parktiń, jergilikti ákimdiktiń jáne órt sóndirýshilerdiń tize qosyp áreket etkeniniń arqasynda tilsiz jaý birden sóndirilip, bar bolǵany jarty gektar jerdi jalyn sharpydy.

Osyǵan deıin «Býrabaı» ulttyq parkinde Smart-Burabay júıesiniń arqasynda 18 órt sóndirilgenin jazǵan edik.