Kókshetaýda Oraz Sársekeevtiń qurmetine memorıaldyq taqta ashyldy
Saltanatty sharaǵa Oraz Asqarulynyń týǵan-týystary, úzeńgiles áriptesteri jáne osyndaǵy eńbek áýletin jalǵastyrýshylar bolyp tabylatyn deponyń jumysshylary qatysty. Sharany «Qazaqstan temir joly - Júk tasymaly» aktsıonerlik qoǵamynyń «Aqmola bólimshesi JT» fılıalynyń dırektory Nurym Janııazov quttyqtaý sózben ashty.
«Mashınıst mamandyǵy temirjolda árqashan qurmetti de jaýapty bolǵan jáne bola da beredi. Oraz Asqaruly óz mamandyǵynyń bıik shyńyna shyǵyp, temirjol salasynyń damýyna eleýli úlesin qosa bildi», - dedi ol óz sózinde.
Sonymen qatar, «Qazaqstan temir joly» aktsıonerlik qoǵamynyń ókili Erlan Qızatov, «Ardager uıymy» qoǵamdyq birlestiginiń oblystyq fılıalynyń tóraǵasy Ǵosman Tóleǵul quttyqtaý sóz sóılep, Oraz Asqarulynyń eńbegi týraly aıtyp berdi .
Oraz Asqaruly eńbek jolyn 1973 jyly Kókshetaý sıgnal berý jáne baılanys dıstantsııasynyń elektromehanık qyzmetinen bastady. 1980-1983 jyldary aralyǵynda jańadan qurylǵan tyń temir joly Býrabaı kýrorty sıgnal berý jáne baılanys dıstantsııasynyń basshysy qyzmetinde boldy. Baılanysshylar ujymy Tselınograd - Kókshetaý - Jańa Esil júk mólsheri kóp baǵyttaryndaǵy ekinshi joldardy daıyndap, paıdalanýǵa engizýge, Tselınograd - Kókshetaý ýchaskesin elektrlendirýge, Kókshetaý, Jańa Esil iri temir jol toraptaryn damytýǵa belsendi qatysty. Osy kezde Oraz Asqarulynyń basshy retinde ózindik qoltańbasy, adamdarmen jumys isteý daǵdysy qalyptasty. 1997 jyly Oraz Asqaruly Aqmola temir joly Kókshetaý fılıalynyń basshysy, 1998 jyly poıyzdar qozǵalysynyń qaýipsizdigi boıynsha revızordyń orynbasary, 2002 jyldyń akpanynda bas revızory, al 2002 jyldyń shildesinde Aqmola magıstraldyq jeli bólimshesiniń dırektory bolyp qyzmet istedi. Oraz Asqaruly qandaı qyzmet atqarsa da óziniń baısaldy kózqarasymen, qatań tártibimen, eńbeksúıgishtigimen jáne jaýapkershiligimen erekshelendi.