Kókshetaýda nóserden keıin kósheler men aýlalardy sý basyp qaldy
Jańbyr sýy kólik qatynasyna, ásirese jaıaý adamdardyń qozǵalysyna qıyndyq týǵyzdy.
Qala turǵyndary sý basqan úı aýlalaryn vıdeoǵa túsirip, áleýmettik jelige jarysa jarııalady. Sonyń biri – «Vasılkovskıı 27» shaǵyn aýdanynyń turǵyny Aleksandr Bondarenko.
«Ádettegideı, bizdegi jertóleler sýǵa toldy. Tipti, úıden shyǵa almaı otyrmyz», - deıdi ol ıýtýb-kanalynda.
Beınejazbadan adamdardyń shalshyq sýdy tizeden keship bara jatqanyn kórýge bolady.
Qaladaǵy birqatar kóppáterli turǵyn úıdiń tóbesinen de sý sorǵalap, turǵyndardy biraz ábigerge saldy. «Stantsıonnyı» jáne «Jaılaý» shaǵynaýdandaryndaǵy jekemenshik úılerdiń aýlasyna da sý ketkeni belgili boldy. Nazarbaev pen Severnaıa kósheleriniń qıylysynda shalshyq sý jınaldy. Sonymen birge, ortalyq bazar aýmaǵynda da saýdagerler men turǵyndardyń qozǵalysy qıyndady.
Aıta ketsek, budan buryn Tselınograd aýdanynyń Qoıandy aýylynda elektr stantsııasyna naızaǵaı túsip, jergilikti aýqymdaǵy tótenshe jaǵdaı jarııalanǵan bolatyn.