Kókshetaýda «Namys» saıası klýbynyń májilisi ótti
Jıynda QR Prezıdenti Qasym-Jomart Toqaevtyń úndeýine Qazaqstan kommýnıstik halyq partııasy Aqmola oblystyq komıtetiniń birinshi hatshysy Beısenbaı Májıtov keńinen toqtalyp, saıası sheshimdi qoldaıtynyn jetkizdi. Mańyzdy oqıǵanyń aıryqsha máni týraly pikirtalasqa jınalǵan jastarǵa jan-jaqty tarqatyp aıtyp berdi.
«Aldymyzdaǵy Prezıdent saılaýynan soń Elbasy irgesin qalap bergen jasampaz ister jalǵasyn tappaq. Bolashaq el taǵdyryn sheshetin tulǵa jastar úshin barynsha jaǵymdy jańalyqtardy, jaqsylyqqa toly bastamalardy jalǵastyrady dep senemiz», - dedi Beısenbaı Májıtov.
Al, Aqmola oblysynyń jumyspen qamtýdy jáne áleýmettik baǵdarlamalardy úılestirý basqarmasy basshysynyń orynbasary Sholpan Rahmatýlına jastardy eńbekpen qamtý máseleleri qanshalyqty júzege asyp jatqanyna toqtaldy.
Onyń sózinshe, óńirimizde «tıimdi jumyspen qamtýdy jáne jappaı kásipkerlikti damytý» baǵdarlamasy júzege asyrylýda. Sońǵy úsh jyldaǵy kórsetkish boıynsha bizde jastardyń arasynda jumyssyzdyq azaıyp keledi. Sońǵy úsh jylda 2 myńnan astam adam shaǵyn nesıe alǵan, onyń ishinde 190 adam nemese 10 paıyzy jastar.
Osy oraıda, oblystyq ishki saıasat basqarmasy jastar isi jónindegi bóliminiń jetekshisi Damır Іrgebaev Ult Kóshbasshysy Nursultan Nazarbaevtyń saıasatyna joǵary baǵa berdi. Ásirese, bıylǵy jyldyń Jastar jyly atalýynyń mańyzyna toqtaldy. Osy oraıda Jastar jyly ishinde oblys ortalyǵynda stýdent jastarǵa arnalǵan birneshe jataqhana salý kózdelýde. Jataqhanalar Sh.Ýálıhanov atyndaǵy Kókshetaý memlekettik ýnıversıtetinde, A.Myrzahmetov atyndaǵy ýnıversıtete, sondaı-aq, tórt kolledjde salynbaq.
«Baǵdarlama aıasynda Kókshetaý qalasynda 424 jas otbasy úshin 6 kóp qabatty turǵyn úı boı kóteretin bolady. Bul baǵdarlamanyń artyqshylyǵy, páter qunynyń tómendigi. Jastarǵa jasalyp jatqan jaqsylyq az emes, oblysta «7-20-25» turǵyn úı baǵdarlamasy belsendi jumys isteýde. Qazirdiń ózinde 500-den astam adam baspana máselesin sheshti. Bul Tuńǵysh Prezıdentimizdiń bes áleýmettik bastamasynyń sharapaty», dedi Damır Іrgebaev.
Sonymen qatar, bolashaq el taǵdyryn sheshetin tulǵa jastar úshin barynsha jaǵymdy jańalyqtardy, jaqsylyqqa toly bastamalardy jalǵastyrady dep senemiz degen pikirler de aıtyldy.