Kókshetaýda «Mereıli otbasy» baıqaýynyń oblystyq jeńimpazdary anyqtaldy (FOTO)
Bul joly «Dostar mádenıet» saraıynda ótken saltanatty shara «Mereıli otbasy» baıqaýynyń ánuranymen bastaldy. Atalǵan baıqaýdyń basty maqsaty - otbasy ınstıtýtyn nyǵaıtý, otbasylyq qundylyqtar men qazaqstandyq januıanyń jaǵymdy ımıdjin jastar arasynda jan-jaqty nasıhattaý. Ótken jyly «Mereıli otbasy» ulttyq baıqaýynyń respýblıkalyq kezeńinde Aqmola oblysynyń namysyn kókshetaýlyq Kákpenovter men sandyqtaýlyq Mýhınder otbasylary abyroımen qorǵaǵan bolatyn.
Ulttyq baıqaýda sóz alǵan oblys ákiminiń orynbasary Nurlan Nurkenov baıqaýǵa qatysýshylardy quttyqtap, oblysta ár túrli salada uzaq jyldar boıy úzbeı qyzmet etip kele jatqan áýletterdi atap ótti. Sondaı-aq, baıqaýda jeńimpaz atanǵan otbasylarǵa dıplomdar men baǵaly syılyqtardy tabys etti.
Oblystyq «Mereıli otbasy» baıqaýynyń uıymdastyrý komıtetiniń sheshimimen osy sharaǵa belsene qatysqany úshin Agafonovtar áýleti marapattaldy. Agafonovtar - eki din men eki ulttan quralǵan aralas otbasy. Oblystyq «Baqyt shańyraǵy» baıqaýynyń bas júldesine ıe bolǵan olar Sandyqtaý aýdany ákiminiń alǵys hatymen marapattalǵan berekeli de merekeli shańyraq.
Osyndaı yntalandyrý syılyǵymen Loshakovtar otbasy da marapattaldy. Bul ustazdar áýletiniń jalpy eńbek ótili 407 jyl eken. Bul jolǵy baıqaýdyń taǵy bir ereksheligi - ol eki otbasynyń, ıaǵnı, kókshetaýlyq Aıtqojındar jáne qorǵaljyndyq Smanovtardyń úshinshi oryn alýy bolyp otyr. Qajyǵalı Aıtqojın eńbek ardageri, kóptegen merekelik medaldardyń ıegeri. Jubaıy Qazken Aıtqojına da «Altyn alqa» alqasymen marapattalǵan Batyr ana. 2012 jyly otaý qurǵandarynyń 60 jyldyǵyn toılaǵan, 11 bala ósirip, solardan nemereler men shóbereler súıip otyrǵan úlgili otbasy. Qorǵaljyn aýdanynan Smanovtar otbasy baıqaý qorytyndysyna kele almapty. Degenmen, oblys ákiminiń orynbasary kórermender aldynda alǵys hattary men baǵaly syılyqtaryn jetkizip beretindikterin aıtty. Baıqaýda ekinshi oryndy Jarqaıyń aýdanynan Sultanovtar jáne Zerendi aýdanynan Ybyraevtar otbasylary ıelendi. Sultanovtar áýletiniń uıytqysy bolyp otyrǵan Rahıma apaı búgingi tańda zeınetker, ul-qyzdarynan 25 nemere, 8 shóbere súıip otyrǵan Batyr ana bolsa, Saıran men Gúlnur Ybyraevtar da kóp balaly otbasy atanyp otyrǵan jandar.
Al, baıqaý jeńimpazy qurmetti ataqqa Sandyqtaý aýdanynan Dokaevtar otbasy men Bulandy aýdanynan Ákimbaevtar otbasy ıe boldy.
Dokaevtar áýletiniń otaǵasy Atlana Alıevıch Sandyqtaý aýdanynyń qurmetti azamaty, «Sandyqtaý Astyq» dıirmeniniń qojasy, «Aýyl sharýashylyǵy salasynyń úzdigi» tósbelgisimen marapattalǵan óńirge tanymal kásipker. Makınsk qalasynda turatyn Serik pen Jańylǵan Ákimbaevtar ózderiniń úsh ulynan bólek 17 balaǵa patronatty tárbıe berip otyrǵan qaıyrymdy jandar. Bul kóp ultty otbasynda qazaq balalarymen qatar, ýkraın, tatar, orys, polıak, moldavan ulttarynyń balalary tárbıelenýde.
Osy eki otbasynyń bireýi qyrkúıek aıynda ótetin respýbıkalyq deńgeıdegi «Mereıli otbasy» baıqaýyna qatysyp, oblys namysyn qorǵaıtyn bolady.
Merekelik kesh oblystyń talantty ónerpazdarynyń ásem ánnen shashý shashyp, jınalǵandarǵa kóterińki kóńil kúı syılaǵan kontserttik baǵdarlamaǵa ulasty.