Kókshetaýda Májilis depýtattyǵyna úsh kandıdat bekitildi

KÓKShETAÝ. QazAqparat - Aqmola oblysynda pikirsaıys pen kandıdattarǵa daýys berý qorytyndysy boıynsha Májiliske úmitkerlerdiń partııalyq tizimi bekitildi, dep habarlaıdy QazAqparat tilshisi «Nur Otan» partııasy Aqmola oblystyq fılıalynyń baspasóz qyzmetine silteme jasap.

Partııalyq tizimge úsh qatysýshy endi. Olar: aýmaqtyq partııa fılıalynyń tóraǵasy, Sandyqtaý aýdanynyń ákimi Asqarbek Úısimbaev, «Orlenok» JShS dırektory Pavel Bezverbnyı jáne A.Myrzahmetov atyndaǵy Kókshetaý ýnıversıtetiniń rektory Mádı Elýbaev.

«Nur Otan» partııasy Aqmola oblystyq fılıalynyń kezekten tys ótken aımaqtyq konferentsııasy kezindegi pikirsaıysqa barlyǵy 21 adam qatysty.

Sonymen birge, partııa músheleri oblystyq máslıhat depýtattaryn saılaý boıynsha partııalyq tizimdi bekitti. Ol 58 úmitkerden turady.

Tizimde kóptegen jańa esimder bar, bul fraktsııa quramyndaǵy eleýli ózgeristerdi bildiredi. Sabaqtastyq saqtala otyryp, bekitilgen partııalyq tizim boıynsha qazirgi depýtattardyń 31,2 paıyzy qaıta saılaýǵa barady.

Áıelder sany - 2,5 ese, 35 jasqa deıingi jastar ókili - 20,7 paıyzǵa deıin ósti. Partııalyq tizimge ótken úmitkerlerdiń ortasha jasy - 43 jas, sondyqtan onyń quramy 12 jasqa deıin jasardy.

Partııalyq tizimniń 29,3 paıyzy shaǵyn jáne orta bıznestegi kásipkerlerdiń úlesinde bolsa, 25,9 paıyzyn bilim berý salasynyń ókilderi, 13,8 paıyzyn aýyl sharýashylyǵy jáne basqalary quraıdy.

Osylaısha, oblystyq máslıhattyń quramy shamamen 70 paıyzǵa jańarady.