Kókshetaýda Qytaıdan kelgen qandastar turyp jatqan úıler jóndeýge muqtaj - ákimdik
Keńes otyrysynda QR Bilim jáne ǵylym mınıstrligi tarapynan shet elderdegi etnıkalyq qazaqtarǵa oqýlyqtar men ádebı kitaptar jiberý, Aqmola oblysynyń Krasnyı ıAr, ShQO Shyǵys aýylyndaǵy shetelden kóship kelgen qandastarymyzǵa berilgen arendalyq úıdiń búgingi jaǵdaıy jáne Repatrıatsııany yntalandyrý (úı-jaımen, jer telimderimen, kóterme qarjylarmen qamtý) máseleleri qozǵaldy.
Sheteldegi qandastarymyzǵa arnalǵan kitap daıyndaýda qajetti oqýlyqtarǵa áli de basymdyq berilmegeni aıtyldy. Qoǵamdyq komıssııa músheleri qajetsiz kitap shyǵarý jobasyn qysqartyp, qandastar turatyn memlekettermen kelisý arqyly suranysqa saı kitap shyǵarylsa degen oılaryn jetkizdi.
Atajurtqa kelip órisi keńigen aǵaıynnyń osydan 5-10 jyl buryn qýanyshy eselengen edi. Krasnyı ıAr men Shyǵys aýylynan 2-3 bólmeli úı alyp, qonys toıyn toılaǵan jurttyń shattyǵy uzaqqa sozylmady. Sharshy metrine - 88 teńge, orta eseppen bir úıdiń aılyq arendalyq quny 6866 teńge bolyp baǵalanǵan. Búgingi kúnde 276 otbasy sapasyz salynǵan úılerdiń arendalyq quny úshin memleketke 73,4 mln teńge qaryz. Turǵyndar sapasyz salynǵan úıler úshin arendalyq aqshany tóleýden bas tartyp otyr.
«2019 jyly qarasha aıynda áriptesterimizben Kókshetaý qalasy, Krasnyı ıAr aýylyndaǵy úılerdi kózimizben kórdik. Kún endi sýyta bastaǵan edi. 10-15 úıdi araladyq. Úılerdiń jalpy jaǵdaıy adam aıtqysyz dárejege jetken. Úı qabyrǵalary óte juqa, irgetasy joq, edenderine qaraqaǵaz tóselgen. Tóbe jaqtaýlary óte juqa salynǵan. 2009-2010 jyldary «Nurly kósh» baǵdarlamasymen salynǵan úılerdiń árbirine sol kezdegi dollar baǵamymen 59 myń dollar qarjy jumsalǵan. Osy úılerdiń sapasyz salynǵanyn, qarjynyń talan-tarajyǵa túskenin aıtyp, bir top depýtat Úkimet basshysy Asqar Uzaqbaıulyna depýtattyq saýal jiberdik. Bul máseleni sheshýdiń bir joly - barlyq úıdi jerimen birge jekeshelendirip berý qajet», - dedi qoǵamdyq komıssııa men QR Parlamenti Senatynyń Áleýmettik – mádenı damý jáne ǵylym komıtetiniń tóraǵasy Murat Baqtııaruly.
Qoǵamdyq komıssııa otyrysyna Kókshetaý qalasy ákiminiń orynbasary Beıbit Júsipov qatysyp, komıssııa músheleri qoıǵan suraqtarǵa jaýap berdi.
«Qazirgi ýaqytta 137 turǵyn úıdiń 35-i kúrdeli jóndeýdi jáne 102 aǵymdaǵy jóndeýdi qajet etedi. Kókshetaý qalasy ákimdigi shaǵynaýdanda salynǵan turǵyn úılerdi tehnıkalyq tekserý úshin qarjy bóledi. Tekserý júrgizýge 2020 jyly barlyǵy 15,7 mln teńge bólý josparlanǵan. Shilde aıyna deıin turǵyndarǵa úıi men jeriniń jańa qujatyn daıyndap berý jumystary bastaldy», - deıdi Kókshetaý qalasy ákiminiń orynbasary Beıbit Aıtymuly.
Qytaıdan kelgen qandasymyz Rahym Aıyp elge keletin qandastarymyzdyń basym bóligi eginshi-malshy ekenin alǵa tartty. Osy oraıda aldaǵy ýaqytta «sharýashylyqpen aınalysqysy keletin azamattar úshin memleket jer bere ala ma?» degen suraǵyn qoıdy. Aýyl sharýashylyǵy mınıstrliginen kelgen jaýapty qyzmetker Aqmola, Shyǵys Qazaqstan, Pavlodar, Qostanaı oblystarynda memleket ıeliginde jer bar ekenin, sharýashylyqpen aınalysqysy kelgen qandastarǵa jer beriletinin jetkizdi.