Kókshetaýda qubyr jarylyp, birneshe kósheni sý basty

KÓKShETAÝ. QazAqparat – Kókshetaýda Aqan seri kóshesindegi magıstraldy sý qubyry jarylyp, birneshe kósheni sý basty, dep habarlaıdy QazAqparat tilshisi.

«Kókshetaý sý arnasy» kommýnaldyq kásiporny mamandarynyń málimetinshe, apatty joıýǵa tıisti mamandar tartyldy. Sonymen birge apat bolǵan kósheniń osy ýchaskesinde jol qozǵalysy shekteldi.

«Turǵyndarǵa qubyr arqyly sý jetkizýde problemalar týyndady. Biraq sý berý tolyq toqtaǵan joq. Tek sýdyń qysymy sál tómendedi. Qazirgi ýaqytta jóndeý jumystary júrgizilýde», - dedi Kókshetaý qalasy ákimdiginiń baspasóz hatshysy Janna Ábdirahmanova.

Aıta ketsek, budan buryn Kókshetaý turǵyndary qalada aýyzsýdyń sapasy syn kótermeıtinin aıtqan edi.

Ashyq kózderden alynǵan foto