Kókshetaýda QR Halyq artisi Jibek Baǵysova týraly kitap tanystyryldy
Іs-shara oblystyq Іshki saıasat basqarmasyna qarasty «Rýhanı jańǵyrý» óńirlik jobalaý keńsesiniń uıymdastyrýymen Aqmola oblystyq qazaq teatrynyń 25 jyldyǵynyń jáne Halyqaralyq áıelder kúniniń qarsańynda ótti. Oǵan óńir ákiminiń orynbasary Aına Mysyrálimova, oblystyq Mádenıet, arhıvter jáne qujattamalar basqarmasynyń basshysy Aıgúl Sábıtova, «Rýhanı jańǵyrý» óńirlik jobalyq keńsesiniń basshysy Maral Jaqypova, Sh.Husaıynov atyndaǵy oblystyq qazaq mýzykalyq-drama teatry ujymy men zııaly qaýym ókilderi qatysty.
Jıynda sóz alǵan Sh.Ýálıhanov atyndaǵy Kókshetaý ýnıversıtetiniń professory, fılologııa ǵylymdarynyń kandıdaty Sábıt Jámbek, Aqmola oblystyq ardagerler keńesiniń tóraǵasy, jazýshy-aýdarmashy, Sh.Ýálıhanov atyndaǵy Kókshetaý ýnıversıtetiniń qurmetti professory Ǵosman Tóleǵul, aqyn-jazýshy, Qazaqstan Jazýshylar odaǵynyń múshesi Serik Jetpisqalıev, alpys jyl ǵumyryn sahnaǵa arnaǵan tulǵanyń ózi jaıly, óneri jaıly tolǵaǵan kitaby týraly pikirlerin ortaǵa saldy.
Kitapqa Jibek Baǵysovanyń áserli, taǵylymy mol estelik áńgimesimen birge Kókshelik óner, mádenıet qaıratkerleriniń, aqyn-jazýshylardyń, jýrnalısterdiń óner tulǵasyna degen júrekjardy pikirleri, tolǵanystary, tebirenisti jyr-óleńderi engizilgen. Ásirese tarlan aqyn, jazýshy, jýrnalıster Tólegen Qajybaı, Baıanǵalı Álimjanov, Ómirzaq Muqaı, Iran Ǵaıyp, Serik Jetpisqalıev, Erbolat Baıatuly, Baıqal Baıádildiń, Baqbergen Amalbektiń, el azamattary - Iran Tasqara, Murat Ydyrysovtardyń pikirleri, tolǵanystary, jyr joldary engizilgen.
Kitaptyń qundylyǵyn «Nartaı Bekejanov atyndaǵy Qyzylorda oblystyq qazaq-mýzykalyq drama teatrynyń sahnasynan syr-sýretter», «Shahmet Qusaıynov atyndaǵy Aqmola oblystyq qazaq-mýzykalyq drama teatrynyń sahnasynan syr-sýretter», «Sahnadaǵy keıipkerlerim», «Esten ketpes estelikter», «Áriptesterim men dostarym», «Otbasym» sııaqty bólimder arttyryp tur.
«Kitap oqyrmandaryna, ásirese ónersúıer jas býynǵa taǵylymy mol, ǵıbratty dúnıe bolyp shyqqan. Demek, búgingideı «Rýhanı jańǵyrý» atty asa aýqymdy ulttyq sharýa atqarylyp jatqanda atalmysh kitaptyń ónerge ómirin arnaǵan jas býynǵa bereri mol. Kitap tek óner adamdary emes, jalpy qalyń oqyrman qaýymǵa da qyzyqty, tárbıelik máni zor», - deıdi Aqmola oblystyq «Rýhanı jańǵyrý» qoǵamdyq sanany jańǵyrtý baǵdarlamasyn júzege asyrý boıynsha Óńirlik komıssııasynyń músheleri.