Kókshetaýda kórnekti qoǵam qaıratkeriniń qurmetine memorıaldyq taqta ornatyldy

KÓKShETAÝ. QazAqparat - Kókshetaýda Aqmola oblysynyń qurmetti azamaty, kórnekti memleket jáne qoǵam qaıratkeri Chapaı Ábýtálipovtyń týǵanyna 80 jyl tolýyna oraı konferentsııa ótti, dep habarlaıdy QazAqparat tilshisi.

Chapaı Mútállapuly 2016 jyly dúnıeden ozdy. Sharaǵa aımaq basshysy Ermek Marjyqpaev, týǵan týystary, jaqyn dostary jáne burynǵy áriptesteri qatysty.

«Biz búgin kórnekti memleket qaıratkeri, jurtshylyq arasynda zor bedelge ıe, esimi elge tanymal, týǵan elin janyndaı súıip, ólsheýsiz eńbek etken aǵamyzdy eske alýǵa jınalyp otyrmyz. Chapaı Mútállapulynyń adamı jáne kásibı bedeli árqashanda joǵary. Bar ǵumyryn el damýyna arnap, aýyl sharýashylyǵy salasyn órkendetýge, táýelsizdikti nyǵaıtýǵa úlken úles qosty», – dedi Ermek Marjyqpaev.

Aımaq basshysy óz sózinde, jaqyn ýaqytta oblys ortalyǵyndaǵy kóshelerdiń birine Chapaı Ábýtálipovtyń esimi beriletinin atap ótti.

Sonymen qatar, shara barysynda Kókshetaý qalalyq ardagerler keńesiniń tóraǵasy Shııap Álıev, respýblıkalyq ardagerler uıymy ortalyq keńesi tóraǵasynyń birinshi orynbasary Ómirzaq Ozǵanbaev, QR Parlamenti Májilisiniń depýtaty Vladıslav Kosarev, Soltústik Qazaqstan oblystyq ardagerler keńesiniń tóraǵasy Eskendir Eleýsizov, Senatorlar keńesiniń múshesi, jazýshy-dramatýrg Jabal Erǵalıev Chapaı Mútállápuly jaıly ózderiniń jyly lebizderin bildirse, kýrstas dosy Bolathan Ermekbaev sonaý stýdenttik shaqtary jaıly esteligimen bólisti.

Konferentsııa sońynda qatysýshylarǵa Chapaı Ábýtálipov jaıly túsirilgen beınebaıan usynyldy.

Osy kúni Chapaı Mútállápuly turǵan úıdiń qabyrǵasyna memorıaldyq eskertkish taqta ornatyldy.