Kókshetaýda Qoǵamdyq keńes músheleri Joldaýdy talqylady
«Elbasy óziniń bıylǵy Joldaýynda elimizdiń damý jolyndaǵy maqsat-mindetterdi aıqyndap, belgilep berdi. Atalmysh qujattan bolashaqqa bastaıtyn ıgi isterdiń josparyn, memleketti áleýmettik-ekonomıkalyq jaǵynan damytýdyń naqty qadamdaryn kórýge bolady. Osy mańyzdy qujattaǵy kózdelgen mindetterdi ýaqytynda sapaly túrde júzege asyrýǵa árbir qazaqstandyq óziniń úlesin qosatynyna senimimiz zor», - dedi sharaǵa qatysqan Aqmola oblysy ákiminiń orynbasary Aına Mysyrálimova.
Eńbek ardagerleri men qoǵam qaıratkerleri, etno-mádenı, jastar resýrstyq ortalyqtarynyń músheleri qatysqan sharada Qazaqstan halqy Aqmola assambleıasy tóraǵasynyń orynbasary Svetlana Korneeva, Abaı Myrzahmetov atyndaǵy Kókshetaý ýnıversıtetiniń «Rýhanı jańǵyrý» kafedrasynyń meńgerýshisi, tarıh ǵylymdarynyń doktory Roza Sabyrqyzy, QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Aqmola oblysy boıynsha departamentiniń basshysy Bergen Bespalınov jáne basqa da qatysýshylar Memleket basshysynyń Joldaýynda týyndaǵan mindetteri týraly óz oılaryn ortaǵa salyp, ony júzege asyrýǵa bir kisideı at salysatyndyqtaryn aıtty.
Aqmola oblysynyń jastar resýrstyq ortalyǵynyń basshysy Erlan Músipov aldaǵy 2019 jyldyń «Jastar jyly» bolyp jarııalanatynyn basa aıtyp, bul jańalyqty oblys jastary da zor qýanyshpen qabyldap, keler jylǵa úlken úmit artyp otyrǵandyqtaryn atap ótse, «Ulttyq bank» AQ Aqmola oblystyq fılıaly dırektorynyń orynbasary Gúlnár Omarova «7-20-25» baǵdarlamasyn júzege asyrý úshin Ulttyq banktiń janynan «Baspana» ıpotekalyq uıymy» enshiles uıymy ashylǵanyn jáne baǵdarlamanyń basymdyqtary men múmkindikteri týraly túsindirip berdi.