Kókshetaýda Qylshaqty ózenindegi sýdyń deńgeıi túspeı tur
Qala turǵyndary áleýmettik jelide Qylshaqty ózeniniń sý kóterilip, Jaǵalaý jáne Áshimov kósheleriniń túıiser tusynda joldy basyp qalǵandyǵy týraly aqparatpen bólisti. Sonymen birge, Sverdlov kóshesi men №8 mektep tusynda jeke úılerge sý jaqyndaǵany týraly aıtyldy.
Kókshetaý qalasynyń Turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń málimetinshe, qazirgi kezde sý basqan aımaqtarda sý sorý jumystary júrgizilip jatyr.
«Jasalǵan shartqa sáıkes merdigerlik uıym «KóksheTazalyq» JShS-men Kókshetaý qalasynyń aýmaǵynda sý tasqynyna qarsy is-sharalar qolǵa alynǵan. Búgingi tańda Qylshaqty ózenindegi sýdyń deńgeıi joǵarlaǵany baıqalady. Sol sebepti turǵyn úı aýlalary men kóshe boıyndaǵy sýdy sorý, ózen arnasyn nyǵaıtý jumystary jalǵasyp jatyr. Sýdy bógeý jáne sorý jumystary turǵyndardan kelip túsken ótinimderge sáıkes pysyqtady. Ótinimder I-komek-109 arqyly, sondaı-aq sý tasqynyna qarsy shtabtyń 8-716-2-29-78-34, 8775-666-99-08 telefondary arqyly qabyldanady», - dedi vedomstvodan.
Aqmola oblysy TJD baspasóz qyzmetiniń málimetinshe, qazirgi ýaqytta joldyń ústindegi sýdy Qylshaqty ózeniniń arnasyna burý jáne №12 orta mektep aýmaǵynda, Úkili Ybyraı atyndaǵy Aqmola oblystyq fılarmonııasy tusynda qum salynǵan qapshyqtardy tóseý, sondaı-aq, Krasnoıar kentiniń Zarechnaıa kóshesindegi sý aǵyzý jumystary júrgizilip jatyr. Oǵan Aqmola oblysy TJD, jergilikti atqarýshy organdar, M.Ǵabdýllın atyndaǵy azamattyq qorǵaý akademııasynyń, QR Ulttyq ulany 5510 áskerı bóliminiń kýrsanttarynan quralǵan barlyǵy 164 adam, 22 tehnıka jáne 13 motopompa jumyldyrylǵan.
Bir táýliktiń ishinde 850 metr bóget nyǵaıtylyp, 5200 qap tóseldi jáne shamamen 3000 tekshe metr sý soryldy.
Aıta ketsek, budan buryn Kókshetaýda temirjol saıajaıyn sý basyp qalǵanyn jazǵan edik.