Kókshetaýda Qylshaqty ózeni arnasynan asyp, temirjol vokzaly mańyn sý basty

<p>KÓKShETAÝ. KAZINFORM - Kókshetaýda Qylshaqty ózeni arnasynan asyp tasydy. Saldarynan Temirjol mańy aýdanyndaǵy Shalqar kóshesiniń boıyndaǵy turǵyn úıler men aýlalardy sý basty. Sý úılerdiń podezderine kirýde.</p>

Qylshaqty ózeniniń arnasynan asqandyǵy týraly vıdeony jergilikti BAQ pen turǵyndar áleýmettik jelide jarııalady. Onda sý tasqynyna baılanysty qalalyq №12 orta mekteptiń mańyndaǵy jáne Abaı kóshesiniń tusyndaǵy Qylshaqty ózeni arqyly ótetin kópirler jabylǵany aıtylady. Sýdyń aǵysynyń kúshtiligi sondaı, sol mańdaǵy turǵyn úıler men kóshelerge jaıylý qaýpi bar. 

Degenmen, jelidegi vıdeodan aǵyn sýdyń turǵyn úılerdiń aýlalary men podezderine kirgenin kórýge bolady.

Qazirgi kezde, qalalyq kommýnaldyq qyzmetter men tıisti organdardyń qyzmetkerleri men tehnıkalary sý sorý jumystaryn júrgizýde. Qalalyq ákimdiktiń málimetinshe, Qylshaqty ózeni arqyly ótetin Abaı kóshesi boıyndaǵy kópirdiń tusynda muz keptelisi oryn alǵan.

«Kókshetaý qalasyndaǵy sý tasqynyna qarsy jumystarǵa Aqmola oblysy TJD jeke quramynan 41 adam men 9 motopompa, jergilikti atqarýshy organdardan 13 adam jáne 7 ınjenerlik tehnıka, M.Ǵabdýllın atyndaǵy AQ akademııasynan 50 kýrsant jumyldyryldy. Dál qazir Abaı kóshesindegi kópirdiń aldyndaǵy muz keptelisi joıylýda», - dedi Kókshetaý qalalyq ákimdiginen.

Aıta ketsek, budan buryn Aqmola oblysynda birqatar joldardy sý basqanyn jazǵan edik.