Kókshetaýda karantın talabyn jıi buzǵan kafe-bar 3 aıǵa jabyldy

KÓKShETAÝ. QazAqparat - Kókshetaý qalasynda karantınniń turaqty buzylýyna baılanysty «Rýkı ız plechı» JShS-niń JJT barynyń jumysy 3 aıǵa toqtatyldy, dep habarlaıdy QazAqparat tilshisi Aqmola oblysynyń sanıtarlyq epıdemıologııalyq baqylaý departamentine silteme jasap.

Vedomstvonyń málimetinshe, mekemeniń jumysyna tıym salynýy karantındik sharalardyń birneshe ret buzylýyna baılanysty bolyp otyr.

Qyzmetti toqtatý týraly sheshimdi Kókshetaý qalasynyń mamandandyrylǵan ákimshilik soty qabyldady.

«Oblys boıynsha barlyǵy 11 oıyn-saýyq mekemesi karantın rejımin qasaqana buzýshylar bolyp tabylady, onyń ishinde JShS-niń JJT bar. Bul nysan birneshe ret ákimshilik jaýapkershilikke tartyldy, eki ret 670910 teńge somasyna ákimshilik aıyppul salyndy. Bul sharany da kásipker elemedi. Uıǵarymdardyń oryndalmaýyna baılanysty osy obektige qatysty materıaldar ákimshilik sotqa berildi. Nátıjesinde sot materıaldy qarap, qyzmetin úsh aıǵa toqtata otyryp, 100 aılyq eseptik kórsetkish mólsherinde aıyppul saldy», - dedi Aqmola oblysynyń sanıtarlyq epıdemıologııalyq baqylaý departamentiniń basshysy Aınagúl Mýsına.

Vedomstvodan atap ótkendeı, shekteý jáne karantın sharalaryn birneshe ret buzýǵa jol bergen 10 ákimshilik is boıynsha materıaldar Kókshetaý qalasynyń mamandandyrylǵan ákimshilik sotyna jiberildi.

Kásipkerlik sýbektilerine qatysty osy materıaldar qaraýda jatyr.

Aıta keteıik, shekteý sharalary men sanıtarlyq erejelerdi júıeli (eki-úsh ret) jáne qasaqana buzý oqıǵasy anyqtalǵan jaǵdaıda materıaldar mamandandyrylǵan ákimshilik sotqa beriledi.

Zań boıynsha tártip buzýshylardyń jaýapkershiligi uıymnyń qyzmetin toqtata turýǵa deıin qarastyrylǵan.