Kókshetaýda karantın rejımin jıi buzǵan meıramhana qyzmetine tyıym salyndy

KÓKShETAÝ. QazAqparat - Kókshetaýda karantın rejımin jıi buzǵan «Merýert» meıramhanasynyń qyzmetin sot 30 kúnge toqtatyp, 100 aılyq eseptik kórsetkish kóleminde ákimshilik aıyppul saldy, dep habarlaıdy QazAqparat tilshisi Aqmola oblystyq sanıtarlyq-epıdemıologııalyq baqylaý departamentiniń baspasóz qyzmetine silteme jasap.

Kókshetaý qalalyq sanıtarlyq-epıdemıologııalyq baqylaý basqarmasynyń basshysy Qanat Ysqaqovtyń aıtýynsha, «Merýert» meıramhanasy shekteý sharalaryn júıeli túrde saqtamaǵan. Qoldanystaǵy tyıymdarǵa qaramastan, meıramhana zaldarǵa kelýshilerdiń kóp sanyn jınap jumys istedi. Buǵan deıin kásipker birneshe ret ákimshilik jaýapqa tartylyp, aıyppul salyndy. Biraq bul shara eshqandaı nátıje bermedi.

«Qasaqana karantın rejımin buzýshylar (birneshe ret buzýshylar) boıynsha materıaldar sotqa olardyń qyzmetin 1 aıdan 3 aıǵa deıingi merzimge toqtata turý týraly beriledi»,- dep atap ótti Qanat Ysqaqov.

Eske sala ketsek, óńirde karantındi saqtaý boıynsha mobıldi toptardyń jumysy jalǵasýda. Jyl basynan monıtorıngtik toptar ártúrli menshik nysanyndaǵy 29752 obektini tekserdi.