Kókshetaýda iz-túzsiz ketken 65 jastaǵy áıel bir aıdan beri tabylmaı jatyr

KÓKShETAÝ. QazAqparat - Kókshetaýda joǵalǵan 65 jastaǵy áıelge izdeý jarııalandy, dep habarlaıdy QazAqparat tilshisi.

Aqmola oblystyq PD baspasóz qyzmetiniń málimetinshe, 15 mamyrda Kókshetaý qalalyq PB kezekshi bólimine 34 jastaǵy jergilikti turǵyn habarlasyp, 1957 jylǵy anasy Tańsholpan Qoıbaǵarqyzy Hasenovany izdep tabýǵa kómek suraǵan.

Er adamnyń sózinshe, anasy mamyrdyń 14-de saǵat 10:00 shamasynda úıinen shyǵyp ketip, qaıtyp oralmaǵan.

«Joǵalǵan adamdy izdeýge Kókshetaý qalalyq PB jeke quramy, eriktiler tartyldy. Olar temirjol vokzaly, avtovokzal, sondaı-aq vokzal aýdanyndaǵy dámhanalar men qonaq úıler, qalanyń medıtsınalyq mekemelerin súzip shyqty», - dedi vedomstvodan.

PD baspasóz qyzmetinen atap ótkendeı, Tańsholpan Qoıbaǵarqyzynyń boıy - 160 sm, dene bitimi shymyr, shashy qysqa, qońyr tústi.

Ústine kúńgirt kók tústi kóılek, qara týflı kıgen. Betiniń muryn tusynda qaly bar.

Onyń ornalasqan jeri týraly qandaıda bir aqparat biletin adamdar 8(7162) 72-34-06, 8-707-879-12-98 telefon nómirine nemese 102 arnaıy jelisine habarlasa alady.

Aıta ketsek, budan buryn Kókshetaý qalasynda iz-túzsiz joǵalǵan 42 jastaǵy áıel izdestirilip jatqanyn jazǵan bolatynbyz.