Kókshetaýda halal jáne organıkalyq ónimder boıynsha semınar ótip jatyr

KÓKShETAÝ. QazAqparat - Kókshetaýda organıkalyq ónimder óndirisiniń perspektıvalary jáne sertıfıkattaý boıynsha qazaqstandyq kompanııalardy qurý múmkindikteri týraly úsh kúndik semınar ótip jatyr, dep habarlaıdy QazAqparat tilshisi Aqmola oblysy kásipkerler palatasynyń baspasóz qyzmetine silteme jasap.

Vedomstvonyń málimetinshe, Qazaqstanda sońǵy kezderi organıkalyq naryqqa degen qyzyǵýshylyq artyp otyr. Onyń ishinde eń iri organıkalyq ónim óndirýshi Aqmola oblysy aýmaǵynda ornalasqan. Halal jáne organıkalyq ónimder boıynsha akkredıtatsııalaý jáne sertıfıkattaý júıesiniń ókilderi qatysyp jatqan semınardy «Atameken» ulttyq kásipkerler platasynyń «Quzyrettilik ortalyǵy» JShS «Qazaq Organic Food» jáne «Halal Qazaqstan» brendterdi damytý sheńberinde organıkalyq ónimder óndirýshiler odaǵy jáne QR IIDM Tehnıkalyq retteý komıteti birlesip uıymdastyryp otyr.

«Qazaqstannyń keleshegi - organıkalyq ónimderde» deıdi uıymdastyrýshylar. Búkil álem organıkalyq ónimderge bet buryp jatyr. Bir ǵana Germanııanyń ózinde organıkalyq ónimderge degen suranys 10 mıllıard evrony quraıdy.

«Bizdiń elimizde de organıkalyq naryq damyp jatyr. Búgingi kúni elimizde 61 sharýashylyq organıkalyq ónim shyǵarady. Onyń ishinde eń irisi - «Edelweis Invest» JShS aqmolalyq kompanııa. Sharýashylyq 27 myń gektar alqapta sertıfıkattalǵan organıkalyq ónim shyǵarady.

Jalpy, elimizde 277 gektar jerde organıkalyq ónimder ósiriledi. Qazaqstannan Eýrodaqqa jylyna 10 mıllıon dollar somasynda taýar ótkiziledi. Basty eksporttaýshylar - Aqmola, Qostanaı, Pavlodar, Shyǵys Qazaqstan, Qaraǵandy, Almaty oblystary bolyp otyr. Bıdaı, maıly daqyl, burshaq daqyldary sııaqty 20 túrli ónimge suranys artyp keledi», - deıdi vedomstvodan.

Degenmen, «Atameken» ulttyq kásipkerler platasynyń «Quzyrettilik ortalyǵy» JShS basshysy Arsen Kerimbekovtyń aıtýynsha, otandyq setrıfıkattaý kompanııalary bolsa, elimizde organıkalyq naryq qarqyndy damı túser edi. Ázirge, bul iske tek sheteldik sarapshylar tartylýda.

Semınarda sertıfıkat boıynsha halyqaralyq jáne eýropalyq talaptar sóz boldy. Aıta ketý kerek, tıisti sertıfıkat bolmasa otandyq ónim Eýroodaq naryǵyna shyǵa almaıdy.

«Sertıfıkat boıynsha eń bastysy - ózimiz jumys isteýimiz kerek. ES-ten sertıfıkat alý úshin kem degende 3 jyl kútýge týra keledi. Onyń ishinde eń jaqyny Kıshınev qalasynda ornalasqan. Sondyqtan, sertıfıkat berýshi Astanada bolsa, ýaqytty da, qarjyny da únemdeýge bolady. Ókinishke qaraı, Qazaqstan ónimderi tereń zertteýden ótetin kúdikti elderdiń qatarynda. Sol sebepti, ózimizde osyndaı zerttehana bolýy tıis. Úshinshiden, bizge sertıfıkattalǵan kólik qajet. Keleshekte Qazaqstanda, ıaǵnı, otandyq organıkalyq ónimderdi damytý boıynsha soltústik óńirlik hab ashý josparda bar», - deıdi Arsen Kerimbekov.