Kókshetaýda esirtki tasymaldaǵan astana turǵyny 11 jylǵa sottaldy

KÓKShETAÝ. QazAqparat - Aqmola oblysynyń qylmystyq ister jónindegi mamandandyrylǵan aýdanaralyq soty asa iri mólsherde psıhotropty zattardy ótkizý maqsatynda zańsyz satyp alǵan, saqtaǵan jáne tasymaldaǵan Astana qalasynyń 36 jastaǵy turǵynyna úkim shyǵardy. Sot sheshimimen er adam 11 jylǵa bas bostandyǵynan aıyryldy, dep habarlaıdy QazAqparat tilshisi oblystyq PD baspasóz qyzmetine silteme jasap.

Vedomstvonyń málimetinshe, Aqmola oblysy PD esirtki qylmysyna qarsy is-qımyl basqarmasyna elordalyq turǵynnyń Aqmola, Pavlodar jáne Qaraǵandy oblystarynyń aýmaǵynda esirtkini zańsyz satýmen aınalysatyny týraly habar túsken.

Jedel-izdestirý sharalary barysynda kúdikti Kóshetaý qalasynyń aýmaǵynda kezekti esirtki satý kezinde ustaldy.

«2022 jylǵy 15 jeltoqsanda kúdikti ustalyp, odan 480 gramnan astam a-PVP jáne 363 gramm efedron tárkilendi. Sot otyrysynda er adam óz kinásin ishinara moıyndady, esirtki tasymaldaǵanyn bilmeıtinin, oǵan qaýip tónip turǵanyn jáne tyıym salynǵan zattardy taratýǵa májbúr bolǵanyn aıtty. Alaıda, esirtki satýshynyń búkil dálelderinen kómek bolmady jáne kinási tolyq dáleldendi», - dedi vedomstvodan.

Sot úkimimen 36 jastaǵy sottalýshy Qylmystyq kodekstiń 297-baby 3-bóligi boıynsha kináli dep tanyldy jáne ortasha qaýipsizdik qylmystyq-atqarý júıesi mekemesinde jazasyn óteı otyryp, 11 jyl merzimge bas bostandyǵynan aıyrý jazasyna kesildi.

Úkim zańdy kúshine engen joq.

Aıta ketsek, budan buryn marıhýana satqan aqmolalyq zeınetker 12 jylǵa sottalǵanyn jazǵan edik.