Kókshetaýda esirtki satýmen aınalysqan úsh pavlodarlyq sottaldy

KÓKShETAÝ. QazAqparat - Aqmola oblystyq mamandandyrylǵan aýdanaralyq soty Pavlodar oblysynyń 21 jáne 22 jastaǵy úsh turǵynyna qatysty qozǵalǵan qylmystyq ister boıynsha úkim shyǵardy, dep habarlaıdy QazAqparat tilshisi.

Aqmola oblystyq PD baspasóz qyzmetiniń málimetinshe, sottalýshylarǵa Qylmystyq kodekstiń 297-babynyń 3-bóligi jáne 300 babynyń 2-bóligi boıynsha aıyp taǵylǵan.

«Esirtki satýshylardy 2022 jyldyń qyrkúıeginde Aqmola oblysynyń Polıtsııa departamenti esirtki qylmysyna qarsy is-qımyl basqarmasynyń qyzmetkerleri jedel áreket etý arnaıy jasaǵynyń qatysýymen uıymdastyrylǵan arnaıy operatsııa barysynda qolǵa túsirdi. Tintý barysynda olardan esirtki tabylyp, tárkilendi. Onyń ishinde 2 keliden astam keptirilgen marıhýana, 1 keliden astam kannabıs (qarasora) tuqymdasynyń on butasy, esirtkini ósirý úshin paıdalanylǵan zerthanalyq jabdyq bar», - dedi vedomstvodan.

Sonymen qatar, ustalǵandardan esirtki zattaryn zańsyz saýdalaýmen aınalysqandyǵyn aıǵaqtaıtyn málimetteri bar uıaly telefondar tárkilendi.

«Qylmystyq ister jónindegi Aqmola mamandandyrylǵan aýdanaralyq sotynyń úkimimen pavlodarlyqtar kináli dep tanylyp, 10 jáne 11 jylǵa bas bostandyǵynan aıyryldy. Olar jazasyn eń joǵary qaýipsizdik qylmystyq-atqarý júıesi mekemesinde óteıdi. Sot úkimi zańdy kúshine endi», - dep tolyqtyrdy vedomstvodan.

Aıta ketsek, budan buryn Aqmola oblysynda psıhotroptyq zattardy saýdalaǵan eki stýdent 10 jylǵa sottalǵanyn jazǵan edik.