Kókshetaýda er adam iri kólemde esirtkimen ustaldy

KÓKShETAÝ. QazAqparat – Kókshetaýdyń 23 jastaǵy turǵyny iri kólemde esirtki zatymen ustaldy, dep habarlaıdy QazAqparat tilshisi.

Aqmola oblystyq Polıtsııa departamenti baspasóz qyzmetiniń málimetinshe, kúdiktini «Qarasora-2022» respýblıkalyq jedel-aldyn alý sharasy aıasynda Esirtki qylmysyna qarsy is-qımyl basqarmasynyń qyzmetkerleri qolǵa túsirgen.

«Kúdikti buryn sottalmaǵan. Onyń zattaryn tárkileý kezinde telefonynan esirtki jasyrylǵan oryndardyń foto derekteri anyqtaldy. Sonymen birge ustalǵan úıdiń syrtynda 5 gramm marıhýana salynǵan 5 zip qaptama, jaldaǵan páterinde gashısh pen marıhýana salynǵan 155 býma tárkilendi. Mercedes avtokóliginiń ishinen kók jáne qyzyl tústi 32 zip qaptama esirtki zaty tabyldy. Munda elektrondy tarazylar, zip-lock qaptamalary jáne ızolenta alyndy», - dedi vedomstvodan.

Saraptama qorytyndysyna sáıkes, er adamnan barlyǵy 477 gramm keptirilgen marıhýana, 106 gramm gashısh, sondaı-aq 4 gramm qarasora sabaǵy tárkilendi.

«Osy faktige baılanysty Qylmystyq kodekstiń 297-baby 3-bóligi 1, 5-bólimsheleri «esirtki quraldaryn, psıhotroptyq zattardy, sol tektesterdi elektrondyq jáne aqparattyq resýrstardy paıdalana otyryp zańsyz saqtaý, ótkizý» boıynsha sotqa deıingi tergeý amaldary basqarma vedomstvodan.

Aıta ketsek, Kókshetaýda esirtki jasalyp kelgen fıtozerthana joıyldy.