Kókshetaýda býkmekerlik keńsege qaraqshylyq shabýyl jasaǵan kúdikti ustaldy
Aqmola oblystyq Polıtsııa departamentiniń málimetinshe, qaraqshylyq shabýyl bıylǵy jylǵy naýryzdyń 22-de bolǵan. Bul týraly Kókshetaý qalalyq Polıtsııa basqarmasyna 22 jastaǵy áıel habarlaǵan.
Kassırdiń sózinshe, túngi saǵat 04:50 shamasynda keńseniń ishine pyshaqpen qarýlanǵan jas jigit basa-kóktep kirgen. Qaskóı betin medıtsınalyq maska jáne sharfpen tumshalap jaýyp alǵan. Kassır men kúzetshini pyshaqpen qorqytyp, aqsha talap etken. Keıin kassa jáne seıftegi bar aqshany alyp, izin sýytqan.
«Oqıǵa ornyna dereý jedel-tergeý toby bardy. Bolǵan oqıǵa týraly aqparat barlyq narıadtarǵa eskertildi. Jedel basqarý ortalyǵynyń beınebaqylaý kameralary arqyly tártip saqshylary kúdiktiniń qaı baǵytta jasyrynǵanyn anyqtady. Kúdikti №6 statsıonarlyq bekettiń janynda polıtsııa qyzmetkerin kórip, pyshaq, sharf, qolǵabyn laqtyryp, turǵyn úıdiń kireberisine tyǵylýǵa tyrysty. Patrýldik polıtsııa batalonynyń qyzmetkerleri aǵa leıtenanttar A.Baltın, E.Tursynbaev, B.Kóshkenbaı Pýshkın kóshesindegi úılerdiń biriniń kireberisinde Zerendi aýylynyń 19 jastaǵy turǵynyn ustady. Ol joǵary qabatqa kóterilip, shatyrda polıtsııa qyzmetkerlerinen jasyrynbaqshy boldy», - dedi vedomstvodan.
Er adamnan zattaı dáıekter (pyshaq, aqsha) tárkilendi. Qazirgi kezde kúdikti Kókshetaý qalasyndaǵy ýaqytsha ustaý oqshaýlaǵyshyna qamalyp, ústinen Qylmystyq kodekstiń 192 babynyń 2 bóligi «qaraqshylyq» boıynsha sotqa deıingi is qozǵaldy. Atalmysh sanktsııa boıynsha kúdiktige múlkin tárkileı otyryp, 5 jyldan 10 jylǵa deıin merzimge bas bostandyǵynan aıyrý jazasy qarastyrylǵan.