Kókshetaýda elikter avtojolǵa shyǵyp ketti

<p>Kókshetaýdan shyǵar beriste bir top elik avtojolǵa shyǵyp ketti. Kólik júrgizýshiler olardy vıdeoǵa túsirip, áleýmettik jelide bólisip jatyr, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Aýa raıynyń qubylýyna baılanysty eldi meken aýmaǵynda elikter kóp kezdesedi. Qala kósheleri men turǵyn úı aýlarynda órip júrgen elikterdi turǵyndar qyzyqtaýda, al mamandar bolsa jabaıy janýarlardy tabıǵı ortasyna qýyp álek.

Orman sharýashylyǵy jáne janýarlar dúnıesi ınspektsııasy bóliminiń basshysy Zınalı Aıtqojınniń aıtýynsha, elikterdiń mundaı erekshe minez-qulqy qatty aıazǵa jáne qalyń qarǵa baılanysty. Elikter qorek izdep jáne sýyqtan jylyný úshin eldi mekenderge shyǵady.

«Búgingi tańda Kókshetaý mańynda, qala kóshelerinen elikterdi jıi kezdestirýge bolady. Qala mańynda Shaǵalaly kenti, Elikti taýy, Qyzyltan aýyly jaǵynda orman alqaptary bar. Sondaı-aq Kókshetaý ulttyq parki aýmaǵynda elikter kóptep kezdesedi», - dep túsindirdi Zınalı Aıtqojın.

Aıtýynsha, eldi mekender aýmaǵynda elikterdiń júrgendigi týraly ınspektsııa mamandaryna turǵyndar tarapynan habar kóptep túsip jatyr. Sol sebepti ańshylyq sharýashylyǵyna, ákimdikke hat joldanǵan. Jabaıy janýarlar qala syrtyndaǵy dala jáne ormandy alqaptarǵa shyǵarylyp jatyr.

Aıta ketsek, budan buryn aıazda ashyqqan sibir elikteri Kókshetaý men Atbasar kóshelerin kezip júrgenin jazǵan edik.