Kókshetaýda birinshi halyqaralyq «TeArt-Kókshe» festıvali ótti
Festıvaldi «Rýhanı jańǵyrý» baǵdarlamasy men «Uly dalanyń jeti qyry» maqalasyndaǵy mindetterdi júzege asyrý sheńberinde Aqmola oblysy ákimdigi men Nur-Sultan qalasyndaǵy Reseı ǵylym jáne mádenı ortalyǵy birge uıymdastyrǵan. 30 qazan - 3 qarasha aralyǵynda ótken festıvalge Qazaqstan, Reseı jáne Ýkraına elderinen kelgen 13 teatr ujymy qatysyp, oblys ortalyǵyndaǵy sahnalarda óz ónerin ortaǵa saldy. Shara teatrlar arasynda ónerdi nasıhattaýǵa, áriptestikti, mádenı jáne shyǵarmashylyq baılanysty nyǵaıtýǵa baǵyttalǵan.
Jıynda sóz sóılegen Aqmola oblystyq orys drama teatrynyń dırektory Beıbit Bahtygereev Aqmola oblysy men Kókshetaý qalasynyń mádenı ómirindegi aýqymdy sharanyń mańyzyna toqtaldy.
«Qazaqstandaǵy orys teatrlarynyń óńiraralyq festıvalin ótkizýde tájirıbemiz bar. Osyndaı aýqymdy sharany ótkizýge qol ushyn sozǵan Aqmola oblysy ákimdigi men Reseı ǵylym jáne mádenı ortalyǵyna alǵysymyzdy bildiremiz», dedi Beıbit Bahtygereev.
Festıvalge T.Júrgenov atyndaǵy Qazaq ulttyq akademııasynyń tarıh jáne teatr teorııasy óneri kafedrasynyń meńgerýshisi Sánııa Qabdıeva jetekshiligimen Qazaqstan, Reseı, Germanııa, Grýzııa elderinen kelgen teatr maıtalmandary qazylyq etti. Olardyń arasynda Erkin Jýasbek, Armıne Oganesıan, Nııaz Aglamov, Nına Mazýr, Laha Chhartıshvılı bar.
Sharanyń jabylý saltanatynda aımaq basshysy Ermek Marjyqpaevtyń atynan Aqmola oblysy ákiminiń orynbasary Aına Mysyrálimova quttyqtaý sóz sóılep, qatysýshylar men qazylardy oblys ákiminiń Alǵys hatymen marapattady.
Festıval qorytyndysy boıynsha Shyǵys Qazaqstan oblysynyń Semeı qalasyndaǵy F.M. Dostoevskıı atyndaǵy memlekettik orys drama teatrynyń ujymy gran-prı ıegeri atansa, «Groza» dramasyn usynǵan Rıazan memlekettik oblystyq teatrynyń ujymy «Úzdik akterlik ansambl» atalymy boıynsha, «Chıchıkov» spektaklinde Plıýshkın pomeşıktiń rólin somdaǵan Aqmola oblystyq orys drama teatrynyń akteri Tımýr Valıev «Úzdik akter» atalymy boıynsha, «Pısma lıýbvı» spektaklinde Melıssa Gardnerdiń rólin somdaǵan A.N. Ostrovskıı atyndaǵy Kısheshemskıı drama teatrynyń aktrısasy Elına Manapova «Úzdik aktrısa» atalymy boıynsha marapattaldy.
Festıvalge qatysýshylardyń barlyǵy estelik syılyqtarmen marapattaldy.