Kókshetaýda azamattyq qoǵamdy damytý boıynsha forým ótti
Aqmola oblystyq máslıhatynyń hatshysy, oblystyq qoǵamdyq Keńestiń tóraǵasy Dýlat Nurmoldınniń tóraǵalyǵymen ótken forým jumysyna barlyq deńgeıdegi máslıhattardyń hatshylary men depýtattary jáne barlyq deńgeıdegi qoǵamdyq Keńesterdiń tóraǵalary men músheleri qatysty.
D.Nurmoldın óz sózinde búginde oblystyń barlyq óńirlerinde eki jarym jyldan beri jemisti jumys istep kele jatqan qoǵamdyq Keńester birqatar áleýmettik máselelerdi sheshýge qomaqty úles qosyp otyrǵanyn atap kórsetti. Memlekettik organdardyń normatıvtik-quqyqtyq aktilerin qarastyrýmen birge, kópshilikti tolǵandyrǵan ózekti máseleler de osy Keńesterde talqylanady.
Forýmda Aqmola oblysy ákiminiń orynbasary Aına Mysyrálimova quttyqtaý sóz sóılep, keıingi kezde ómirge kelgen osy qoǵamdyq ınstıtýttyń atqaryp kele jatqan jumysyna oń baǵa berdi jáne onyń alda da izdenisti qadamdarǵa baratynyna senim bildirdi.
Al, Qoǵamdyq kelisim mınıstrligi azamattyq qoǵam ınstıtýttarymen ózara is-qımyl jónindegi basqarmasynyń basshysy Gúlbara Sultanova azamattyq qoǵamdy tıimdi damytýda qoǵamdyq Keńesterdiń alatyn ornyna toqtaldy.
Forýmnyń plenarlyq májilisinde sondaı-aq, Shortandy aýdandyq ardagerler keńesiniń tóraıymy Tóken Qızaeva qoǵamdyq Keńes ınstıtýtynyń óńir ómirine ıgi yqpaly, «Tasýmar» seriktestiginiń bas dırektory, Astrahan aýdandyq máslıhatynyń depýtaty Anatolıı Malkov jastarǵa patrıottyq tárbıe berý, «Sara» qoǵamdyq qorynyń basshysy Sara Baımaǵanbetova úkimettik emes uıymdardyń oblystyń qoǵamdyq Keńesterimen ózara is-qımyly, Aqkól aýdandyq máslıhatynyń hatshysy, aýdandyq qoǵamdyq Keńestiń tóraıymy Juldyzaı Salybekova aýdandyq máslıhattyń jáne qoǵamdyq Keńestiń turǵyndarmen jumys tájirıbesi týraly sóz sóılep, óz oı-pikirleri men usynystaryn ortaǵa saldy. Forýmda ashyq mıkrofon jumys istep, qatysýshylar erkin pikir almasty. Sonymen birge, birqatar belsendi depýtattar men qoǵamdyq Keńes múshelerin marapattaý rásimi bolyp ótti.
Budan keıin forýmnyń jumys qorytyndysy shyǵarylyp, atalǵan shara semınar-trenıng túrinde odan ári jalǵasyn tapty. Ár deńgeıdegi depýtattarmen jáne qoǵamdyq Keńesterdiń múshelerimen eki bólek ótkizilgen bul sharalarǵa «Azamattyq Alıans» zańdy tulǵalar birlestiginiń tóraıymy Irına Terenteva jáne Kókshetaý qalalyq máslıhatynyń hatshysy Erkin Isimbaev jetekshilik etti.
«Depýtattar men qoǵamdyq keńester atqarýshy bılikpen ózara birlese jumys isteýi qajet. Óıtkeni olardyń aldynda turǵan mindetter bir birimen tyǵyz baılanysqan. Sonda ǵana halyqtyń ál aýaqtyn kóteretin bolamyz», - dedi forým jumysyn qorytyndylaǵan D.Nurmoldın.