Kókshetaýda aýtızmge shaldyqqan balalardyń kórmesi ótti
Atalǵan sharanyń baǵdarlamasynda balalar týyndylarynyń kórmesi, «Áke, anam, men ...» baıqaýy, anımatorlarmen qımyl-qozǵalys oıyndary, «Biz jeńemiz!» slaıd shoýy, sabyn kópirshikteri oıyndary ótkizildi. №1 Oblystyq arnaıy túzetý mektep-ınternaty basshylyǵynyń málimeti boıynsha, búgingi tańda mektepte 250-ge jýyq bala oqysa, onyń otyzǵa jýyǵy aýtızm dertine shaldyqqandar. Mundaǵy oqytýshylar defektolog mamandar, olar balalarmen jumys jasaýda únemi túrli ádisterdi qoldanýǵa tyrysady.
Aıta ketý kerek, bastamashyl toptyń qatysýshylary aýtızm belgisi bar balalardyń otbasylaryn qoǵamdyq oryndarda kezdestirgen jaǵdaıda óz-ózin qalaı ustaý kerektigin halyqqa habardar etý úshin paraqshalar, aqparat posterlerin basyp shyǵaryp, saýda ortalyqtarynda, emhanalarda, balalar saýyqtyrý ortalyqtarynda ilip qoıǵan.
Sharaǵa Aqmola oblysy ákiminiń orynbasary Aına Mysyrálimova, «Mıras» qoǵamdyq qorynyń basshylary, buqaralyq aqparat quraldary men «Dýman» pedagogıkalyq otrıadynyń ókilderi qatysyp, balalarǵa syılyqtar úılestirdi.
«Búkil dúnıejúzin tolǵandyryp otyrǵan aýtızm máselesin birlesip sheshken jón. Biz óz tarapymyzdan bul máselelerdi keshendi túrde sheship, mundaı balalardyń ata-analaryna barynsha kómek berýge tyrysamyz», - deıdi «Mıras» qoǵamdyq qorynyń basshysy Irına Kostıtsyna
Sonymen qatar, óńirlik kommýnıkatsııalar qyzmetinde oblys ákiminiń orynbasary Aına Mysyrálimovanyń tóraǵalyǵymen aýtızmnen zardap shegetin balalarǵa keshendi kómek kórsetý boıynsha arnaıy jumys tobynyń otyrysy ótkiziledi dep josparlanǵan.