Kókshetaýda aýrýhanadan 40 mln teńgeden astam qarjy jymqyrǵan býhgalter ustaldy

KÓKShETAÝ. QazAqparat - Kókshetaýda aýrýhanadan 40 mln teńgeden astam aqshany urlap áketken býhgalter 1,5 jyldan keıin ustaldy, dep habarlaıdy QazAqparat tilshisi qalalyq prokýratýranyń baspasóz qyzmetine silteme jasap.

Vedomstvonyń málimetinshe, kúdikti 2020 jyldyń jeltoqsany men 2021 jyldyń shildesi aralyǵynda Aqmola oblystyq týberkýlezge qarsy dıspanserinde býhǵalter-kassır bolyp jumys istegen. Ol bireýdiń elektrondyq-tsıfrlyq qoltańbasyn zańsyz paıdalaný arqyly esep aıyrysý shotynan shamamen 42 mln teńge somasynda aqshany sheship alyp, keıin izin sýytqan.

«2021 jyldyń shildesinde Kókshetaý qalalyq polıtsııa basqarmasy Qylmystyq kodekstiń 188-baby 4-bóligi 3-bólimshesi (asa iri mólsherde urlyq) boıynsha sotqa deıingi tergep-tekserýdi bastady. Іzdestirý sharalary barysynda kúdikti bıylǵy jyldyń 24 sáýirinde Pavlodar qalasynda ustalyp, ýaqytsha ustaý oqshaýlaǵyshyna qamaldy. Kúdikti qylmysyn tolyq moıyndady jáne maýsymnyń 15-de Kókshetaý qalasynyń prokýratýrasy aıyptaý aktisi boıynsha qylmystyq is materıaldaryn sottyń qaraýyna jiberdi», - dedi vedomstvodan.

Prokýratýranyń baspasóz qyzmetinen atap ótkendeı, Qazaqstan Respýblıkasy Qylmystyq kodeksiniń atalmysh baby boıynsha kúdiktiniń múlki tárkilenip, bes jyldan on jylǵa deıingi merzimge bas bostandyǵynan aıyrý jazasy qarastyrylǵan.

Aıta ketsek, budan buryn alaıaqtyq úshin Aqmola oblysynda polıtseı men onyń sybaılasy sottalǵanyn jazǵan edik.