Kókshetaýda alkogoldik ónimderdiń lıtsenzııasyz satylǵany anyqtaldy

KÓKShETAÝ. QazAqparat - Kókshetaýdyń saýda ortalyǵynda alkogoldik ónimderdiń lıtsenzııasyz satylǵany anyqtaldy, dep habarlaıdy QazAqparat tilshisi Aqmola oblystyq memlekettik kirister departamentiniń baspasóz qyzmetine silteme jasap.

Vedomstvonyń málimetishe, Kókshetaýdaǵy «Jeke batyr» kóterme-bólshek saýda ortalyǵynyń aýmaǵynda júrgizilgen tekseris kezinde óńirdiń memlekettik kirister departamentiniń qyzmetkerleri saýda núktesin kelisim-shart arqyly jaldap otyrǵan kásipker áıeldiń tıisti lıtsenzııasyz alkogoldik ónimderdi saqtap, saýdalaǵany anyqtaldy.

«Bul etıl spırti men alkogoldik ónimderdiń aınalymy jáne óndirisin memlekettik retteý týraly» zańynyń 9-babynyń 3-bóligi boıynsha zańbuzýshylyq bolyp tabylady. Tekseris kezinde 390 shólmek syra, onyń 293 qańyltyr qalbyrda, 59 shólmek araq, 36 shólmek konıak, 2 bótelke vıno anyqtaldy», - deıdi vedomstvodan.

Óńirdiń memlekettik kirister departamentiniń baspasóz qyzmeti atap ótkendeı, tekseris kezinde kásipker áıeldiń joldasy qarsylyq kórsetip, polıtsııanyń kómegine júginýge týra keldi.

«Osy oqıǵaǵa baılanysty ákimshilik is materıaldary jasalyp, alkogoldik ónimder tárkilendi», - dep tolyqtyrdy vedomstvodan.